Дажывём да панядзелка?
97- НАТАЛЛЯ РАДЗІНА
- 19.04.2020, 13:11
- 123,281
Што азначае заканчэнне канікул для беларускіх настаўнікаў.
Адкрыццё з панядзелка ў Беларусі школ - гэта фактычнае вынішчэнне настаўнікаў. Медыкі ў бальніцах хоць неяк абароненыя, хоць і там не стае рэспіратараў і ахоўных касцюмаў, колькасць заражаных каранавірусам медработнікаў ідзе на тысячы, лекары паміраюць.
Што ж абароніць настаўнікаў ад заражэння, калі ім давядзецца знаходзіцца ў закрытым памяшканні з 25-30 дзецьмі на працягу ўсяго працоўнага дня? А многія нашы педагогі - людзі старэйшага і пажылога ўзросту і знаходзяцца ў групе рызыкі. Упэўнена, што, калі рашэнне аб працы школ не скасуюць, найбліжэйшым часам нас чакае выбух заражэнняў і смерцяў сярод педагагічных работнікаў.
Навошта дыктатар гэта робіць? Чаму з такой упартасцю гоніць дзяцей і настаўнікаў у школы, патрабуючы не спыняць навучальны працэс нават у суботу і святы?
Асабіста ў мяне адчуванне, што Лукашэнка, канчаткова страціўшы падтрымку людзей і знешнія крыніцы фінансавання, папросту адчувае, што страчвае ўладу. І сённяшнія яго вар'яцкія ўчынкі – падобныя да істэрыкі. «Апошні гастроль» сапраўды хворага чалавека, які спрабуе ў нямоглай злосці знішчыць як мага больш народа.
Размаўляла сёння з адной занепакоенай настаўніцай. Тая пыталася, што рабіць, як ратавацца? Вядома, дзейнічаць. Іншага я параіць не магу. Баіцеся дзейнічаць у інтарэсах усяго грамадства - пачніце змагацца хоць бы за саміх сябе.
Бо гаворка больш не ідзе пра захаванне працоўнага месца і заробку. Гаворка ідзе пра ваша жыццё. І калі яно вам дорага - адмаўляйцеся, прасіце бацькоў не прыводзіць дзяцей у школы, пішыце петыцыі, выступайце ў незалежных СМІ, пікетуйце аддзелы адукацыі, арганізоўвайце забастоўкі. Спектр дзеянняў шырокі.
Галоўнае - усвядоміць уласнае значэнне і адказнасць і перастаць спадзявацца на іншых.
Наталля Радзіна, галоўная рэдактарка Charter97.org