Беларускі кацёл
52- Яська з-пад Шклова
- 26.04.2020, 21:33
- 142,265
Сілавікі рыхтуюцца да параду «зомбі».
Аналіз таго, што адбываецца ў краіне паказвае што сітуацыя для ўлады па ўсіх франтах імкліва закручваецца паводле песімістычнага сцэнару.
Аперуем звесткамі:
- «галоўны спецыяліст» знаходзіцца ў свеце шызоіднага трызнення
- «прыдворныя ківалы» махаюць на нарадах грывамі і нешта запісваюць у нататнікі, магчыма гэтыя канспекты пасля будуць цікавыя гісторыкам і псіхіятрам
- чыноўнікі на месцах адпрацоўваюць нумар - «Тытанік тоне, аркестр грае»
- дзяржпрапаганда раз за разам прабівае чарговае дно, галоўны пасыл - без панікі, лепш памерці стоячы... у чэргах па пенсію, на парадах, суботніках, у цэхах (патрэбнае падставіць)
- народу дадзенае права на натуральны адбор, частка дагэтуль знаходзіцца ў інфантыльным стане
- сілавікі рыхтуюцца да параду «зомбі» да апошняга здаровага салдата
Падвядзём прамежкавыя вынікі. Беларусь імкліва ператвараецца ў еўрапейскі лепразорый, дзякуючы бяздзейнасці ўлады, сусветныя СМІ змянілі падыходы ў асвятленні, - мы перайшлі з аб'екта насмешак у стадыю «зачумленага».
Гэта будзе мець далёка ідучыя наступствы, з невядомай развязкай. Ужо зараз можна канстатаваць наступнае, - у сярэднетэрміновай перспектыве Беларусь будзе ізаляваная ад усяго свету. Шчаслівыя ўладальнікі пашпарта з «капустай», якая верціцца, змушаныя будуць заставацца на месцах.
На няпэўны час можна забыцца на падпрацоўкі ў Еўропе і Расеі, а таксама турызм, бізнэс і г.д., таму што будзем патэнцыяльнымі разносчыкамі заразы. На фоне гэтага дыктатар збіраецца запускаць Астравецкую АЭС, з інавацыйна дэфармаваным рэактарам.
Ва ўмовах падзення сусветнай эканомікі і, як следства, празмернасці на сусветных рынках энэргарэсурсаў, у тым ліку электраэнэргіі, на розум прыходзіць толькі адно, - яму патрэбная «брудная бомба» для шантажу Еўразвязу.
Так як падзенне ВУП Беларусі пачалося з апярэджаннем сусветнага крызісу на два месяцы, праз недаатрыманне нафтавай і калійнай маржы, можна прагназаваць, што ў далейшым наш абвал выйдзе на ўзровень 15-20% да канца гэтага года.
Гэта супастаўна з падзеннем ВУП Украіны ў 2014-2015г, праз вайну на Паўднёвым-Усходзе краіны.
Прывітанне ўсім памяркоўным - «хавайся ў бульбу абы не было вайны». У выніку да сярэдзіны бягучага года мы атрымаем унутраны кацёл са спыненай эканомікі і масавага беспрацоўя, дровы ў які будзе падкідваць эпідэмія.
Але ёсць і добрыя навіны: калі мы вырашым пакласці канец гэтаму маразму, увесь цывілізаваны свет будзе на нашым баку. Пакуль чакаем спаду эпідэміі, беражом сябе і блізкіх і маральна рыхтуемся да непазбежных перамен.
Яська з-пад Шклова, чытач Charter97.org