Прадаўцы менскіх кватэр масава зніжаюць кошты

На колькі ўпалі кошты?

На мінулым тыдні адбылася знакавая падзея для рынку жылой нерухомасці - імклівы разварот у дынаміцы кошту кватэр. Курсавыя ваганні і навіны пра каранавірус прымусілі многіх прадаўцоў кватэр перагледзець кошты ў сваіх аб'явах, піша realt.by.

Кожны тыдзень расце колькасць ахвотных прадаць кватэру ў Менску. З пачатку сакавіка агульная прапанова на другасным рынку павялічылася амаль на 1,5 тысячы кватэр. І гэта сапраўды шмат - у сярэднім за месяц набываюць менш.

Аж да апошніх тыдняў новаспечаныя прадаўцы выстаўлялі кошт у аб'явах з аглядкай на ўжо размешчаныя ў продажы кватэры-аналагі, не спрабуючы прапанаваць менш. Але да канца месяца стала відавочна, што з такім падыходам наўрад ці ўдасца прыцягнуць увагу пакупнікоў. У выніку сярэдні ўзровень коштаў у аб'явах, якія размясцілі пасля 23 сакавіка, ужо быў на $50 за квадратны метр ніжэйшы.

Не дрэмлюць і тыя, хто прадае кватэру даўно. Трэба разумець, што кошты карэктуюць заўсёды - і на стабільным, і на рынку росту. Распаўсюджаная сярод прадаўцоў тактыка - размясціць аб'яву з завышаным коштам, і паступова зніжаць яго да таго часу, пакуль не атрымаецца намацаць попыт.

Так было і сёлета: у студзені і лютым штотыдзень ў трох сотняў аб'яў карэктавалі кошт у бок зніжэння. У першай палове сакавіка гэты паказчык вырас да 400 аб’яў, а ў другой палове месяца адбыўся сапраўдны ўсплёск. Кошты ў 900 аб'явах былі рэдагаваныя на мінулым тыдні - гэта прыкладна 11,5% ад іх агульнай колькасці.

Хто зніжае найперш?

Сталічныя прадаўцы, як правіла, раней за сваіх «калег» з рэгіёнаў пачынаюць карэктаваць кошты, а таксама робяць больш істотныя зніжкі на пачатку крызісу. Зрэшты, нават іх на мінулым тыдні выперадзілі прадаўцы кватэр у прыгарадзе Менска.

У Заслаўі, Копішчы, Дзяржынску і Калодзішчах цана была зніжаная ў 12-15% аб'яў. У Мачулішчах гэты паказчык дасягаў 16%. Абсалютным лідарам у гэтым паказчыку з'яўляецца Фаніпаль, дзе кошт адкарэктаваны ў меншы бок у кожнай чацвёртай аб'яве.

Можа здацца, што найперш цану зніжаюць на менш ліквідныя кватэры з вялікай колькасцю пакояў, але гэта не так. Самы высокі адсотак зніжак назіраецца цяпер у сегменце 1-пакаёвых кватэр.

Таксама на агульным фоне вылучаюцца кватэры, пабудаваныя ў 2019 годзе. Многія з іх набываліся яшчэ на стадыі будаўніцтва з мэтай далейшага перапродажу, і цяперашнія іх уладальнікі імкнуцца хутчэй зафіксаваць прыбытак.

Цікаўны факт - уласнікі, якія прадаюць кватэру самастойна, у сярэднім наважваюцца на зніжку ўдвая часцей, чым агенцтва нерухомасці.

Зніжаюць на колькі?

2000 даляраў - гэта стандартны «крок» пры зніжэнні кошту ў аб'явах у студзені і лютым. З 17 да 23 сакавіка сярэдняя зніжка вырасла да $2500, з 23 да 30 сакавіка - да $3000. У адсоткавым вымярэнні сярэдняя велічыня зніжкі павялічылася за апошні час з 2,7% да 3,7%, пры гэтым максімальны дысконт некаторых аб'ектаў мог даходзіць да 13-15%.

У абсалютным вылічэнні самая значная зніжка адзначана ў кватэры на праспекце Незалежнасці - кошт знізілі на $91 000, праўда яна ўсё роўна каштуе блізу паўмільёна даляраў.

Не ўсе лічаць, што кошты трэба зніжаць

Блізу 40 прадаўцоў на мінулым тыдні падвысілі кошты, у сярэднім - на $3000. Гэтак жа, як і са зніжкамі, заўсёды ёсць аб'явы, дзе на старце продажу цану выпадкова ці наўмысна занізілі, альбо продаж ажыццяўляўся на рынку, які рос.

Тым не менш, паказчык мінулага тыдня - самы нізкі з пачатку 2020 года. Нават у першы тыдзень пасля Новага года выпадкаў падвышэння коштаў было больш, а пік прыпаў на пачатак лютага, калі кошт на больш высокі перапісалі блізу 200 прадаўцоў.

Пасля працяглага перыяду росту коштаў сталічны рынак жылля становіцца «мядзведжым». Мінулы тыдзень паказаў рашучасць часткі прадаўцоў, якія спяшаюцца максімальна хутка прадаць сваю нерухомасць. Большасць пакуль займае пазіцыю чакання, але з досведу мінулых крызісаў асноўная хваля коштавай карэкцыі яшчэ наперадзе.