Нафтавікі заклікаюць Пуціна капітуляваць

Кампаніі гатовы скараціць здабычу нафты разам з Савудаўскай Арабіяй.

Нафтавая галіна РФ гатовая ўзгадніць скарачэнне здабычы супольна з Савудаўскай Арабіяй і іншымі вядучымі вытворцамі ў адчайнай спробе спыніць зніжэнне коштаў, паведамілі пяць крыніц, знаёмых з пытаннем, піша finanz.ru са спасылкай на Bloomberg.

Хоць Крэмль не пацвердзіў гатоўнасць узяць удзел у скарачэнні здабычы на 10 мільёнаў барэляў за дзень, пра які абвясціў учора ў Твітэры прэзідэнт ЗША Дональд Трамп, дадаўшы рост каціровак у нейкі момант на 35%, нафтавікі РФ гатовыя да скаардынаваных дзеянняў, паведамілі гэтыя крыніцы на ўмовах ананімнасці ў сувязі з прыватнасцю пытання.

Змена пазіцыі РФ адлюстроўвае трывогу з нагоды раптоўнага зніжэння попыту, выкліканага пандэміяй каранавірусу, які можа зрынуць свет у рэцэсію сёлета. Усяго два тыдні таму Пуцін адмаўляўся ісці на якія-небудзь саступкі ў супрацьстаянні з Савудаўскай Арабіяй, пасля таго як Масква адхіліла пагадненне ў абмежаванні здабычы з АПЕК, якая запатрабавала паглыбіць скарачэнні. Гэта прымусіла ўрад Савудаўскай Арабіі пазапаўняць рынак нафтай, што выклікала падзенне коштаў да мінімальнага ўзроўню амаль двух дзесяцігоддзяў на фоне лішку прапановы, у той час як аб'ёмы спажывання значна скараціліся.

Расея можа ўзгадніць трохбаковае пагадненне з Савудаўскай Арабіяй і ЗША, паведамілі чатыры крыніцы ў нафтавых кампаніях РФ. Міністэрства энэргетыкі РФ не змагло падаць аператыўны каментар. У Крамлі пераадрасавалі пытанне ў Мінэнэрга.

У плане эканомікі ўздзеянне каранавіруса ўжо сее такі хаос, што нафтавая ўгода ў найлепшым выпадку толькі змякчыць шкоду. Расея пераглядае бюджэт, рыхтуючыся да нафты па $20 за барэль, паведамілі крыніцы, знаёмыя з абмеркаваннямі. З іх слоў, РФ у выніку павялічыць сёлета запазычанні на 1-1,5 трыльёна рублёў ($13-19 мільярдаў).