Праваслаўны святар пра каранавірус: Вернікі могуць памаліцца дома

БПЦ заклікае вернікаў берагчы сябе і іншых людзей падчас пандэміі.

На днях патрыярх Маскоўскі і ўсяе Русі Кірыл заклікаў вернікаў устрымацца ад наведванняў храмаў праз распаўсюджванне каранавірусу. Такіх гучных заяў кіраўнік Беларускай праваслаўнай царквы (БПЦ) пакуль не рабіў. Хоць раней ён рэкамендаваў ужываць прафілактычныя захады ў храмах, піша kp.by.

- Царквы ў Беларусі адкрытая, а службы ў іх праводзяцца. Пры гэтым прымяняюцца санітарныя нормы, але якія менавіта, вырашае настаяцель храма. Так, дэзінфікуюцца крыжы, іконы, выкарыстоўваюцца аднаразовыя кубачкі для прычасця. Прыхаджан таксама заклікаюць не цалаваць чару падчас прычасця. У храме, дзе я працую, лыжка для прычашчэння пасля кожнага верніка праціраецца спіртам, - распавёў «Камсамолцы» намеснік старшыні Сінадальнага інфармацыйнага аддзела БПЦ протаіерэй Яўген Грамыка. - У прэс-службе БПЦ адзінае меркаванне: вернікам трэба прымаць захады засцярогі і не рызыкаваць. Калі чалавек баіцца, няхай не ходзіць у храм. Можна памаліцца і дома. Асабліва гэта тычыцца тых, хто адчувае недамаганне або мае хранічныя хваробы. Але ні ў якім разе нельга асуджаць тых, хто не ідзе на набажэнства. Застацца цяпер дома - гэта любоў да блізкіх.

Сам святар Яўген Грамыка пазбягае поціскаў рукі з іншымі святарамі і апранае маску ў месцах масавага збору людзей. Прычына таму - сын-інвалід, які знаходзіцца ў зоне рызыкі.

- У нашага малодшага сына мукавісцыдоз (цяжкае прыроджанае захворванне. - Рэд.), і яго трэба берагчы. Нядаўна я купляў яму лекі і ў аптэку прыйшоў у масцы і пальчатках. Сына мы ізалявалі - ён жыве з бабуляй. З ім я маю зносіны праз тэлефон. Пару разоў наведваў яго, але блізка не падыходзіў - здалёку памахаў яму рукой, - кажа Яўген. - Ён на хатнім навучанні, але цяпер мы нават забаранілі настаўнікам да нас прыходзіць. І нездарма гэта зрабілі - у адной з яго настаўніц дыягнаставалі каранавірус. Астатніх дзяцей мы цяпер таксама нікуды не пускаем. Старэйшы сын не наведвае сваю ВНУ, а дачка - гімназію.