Беларусы скардзяцца на падаражанне мукі, хлеба, курыцы і дзіцячага харчавання

Беларусы пачалі тэлефанаваць у МАРГ.

На тэлефонную лінію ў пытаннях наяўнасці тавараў і значнага росту коштаў, у Міністэрстве антыманапольнага рэгулявання і гандлю, за 2 дні паступіла больш за 350 званкоў. Як распавялі ў ведамстве, людзі скардзяцца на падаражанне тэхнікі, масак, антысептыкаў і іншых тавараў, паведамляе tut.by.

Тэлефонная лінія ў МАРГ працуе з 2 красавіка. У першы дзень на яе патэлефанавалі блізу 200 чалавек, на другі - больш за 150.

Больш за ўсё паведамленняў паступае пра моцнае падаражанне цытрын - 42% званкоў, часнаку - 7% і імбіру - 17%. Паводле інфармацыі, якую падаюць людзі, гэтыя тавары падаражэлі на 30-70%.

Паводле нашай інфармацыі, цэны на імбір даходзяць да 36 рублёў за кілаграм. Яшчэ ў сакавіку кілаграм каштаваў 7-8 рублёў. Часнок яшчэ зусім нядаўна прадавалі па 6-8 рублёў за кіло, цяпер за яго просяць да 17 рублёў. Лімоны таксама значна выраслі ў цане. У канцы сакавіка іх прадавалі па 3,5-4,5 рубля, а цяпер кошты даходзяць да 11 рублёў.

Акрамя таго, людзі скардзіліся на падаражанне курыцы, мукі, хлеба, дзіцячага харчавання і іншых прадуктаў. З нехарчовых тавараў пакупнікі заўважылі, што ў кошце вырасла бытавая тэхніка, маскі, антысептыкі і іншыя.

Тое, што на некаторую бытавую тэхніку падняліся цэны, пацвярджаюць і самі прадаўцы гэтых тавараў. У анлайн-гіпермаркеце «21 стагоддзе» казалі, што цэны растуць суразмерна падаражэнню іх закупачнага кошту.

- Але мы трымаемся ў рамках рынку. Цэны на пастаўкі фармуюцца індывідуальна ў залежнасці ад краіны-пастаўшчыка і валюты, на якой яны фіксуюцца. Таму нельга сказаць, што ўсе тавары падаражэлі на нейкую агульную лічбу, яе няма. Дзесьці падаражанне можа быць 4%, дзесьці 10% і гэтак далей, - распавядаюць у анлайн-гіпермаркеце.

Марг папрасіў імпарцёраў і гандлёвыя сеткі абгрунтаваць прычыны падаражання, а таксама пацвердзіць абгрунтаванасць росту коштаў на тавары, на якія паступіла самая вялікая колькасць скаргаў. Калі спецыялісты ведамства выявяць неабгрунтаваны рост коштаў, яны прымуць адпаведныя захады.

Калі вы заўважылі, што за апошні час нешта значна падаражэла, пра гэта можна паведаміць на тэлефонную лінію МАРГ па нумары: 017 327-61-21. Яна працуе па буднях з 9.00 да 13.00 і з 14.00 да 18.00.