Прызнанне медыка: У бальніцу ў Аксакаўшчыне праз каранавірус паклалі больш за 100 чалавек

Усе яны - лекары і абслугоўваючы персанал.

Рэспубліканскую клінічную бальніцу медыцынскай рэабілітацыі ў Аксакаўшчыне Менскага раёна перапрафілююць для прыёму інфіцыраваных хворых. Пра гэта паведамляюць жыхары вёскі і супрацоўнікі самой установы аховы здароўя, паведамляе прэс-служба грамадзянскай кампаніі «Европейская Беларусь».

Пастанова пра гэта была прынятая пасля таго, як у аднаго з пацыентаў ужо дыягнаставалі каранавірус.

«Захварэлы прыбыў з менскай бальніцы хуткай дапамогі пасля аперацыі для рэабілітацыйнага лячэння, - распавёў прэс-службе грамадзянскай кампаніі «Еўрапейская Беларусь» адзін з супрацоўнікаў бальніцы. - Прабыў у Аксакаўшчыне 6 дзён, пасля чаго з'явіліся прыкметы віруса. Увесь гэты час ён наведваў фізіапрацэдуры, кантактаваў з вялікай колькасцю медперсаналу. Калі яму стала дрэнна, яго перавялі ў рэанімацыю, дзе ён прабыў 2 дні да таго, як прыехала спецбрыгада. Усе гэтыя кантакты - лекары і абслугоўваючы персанал, цяпер знаходзяцца ў гэтай жа лякарні як кантрактнікі першага ўзроўню. Іх больш за 100 чалавек. Столькі на сёння выпісана бальнічных лістоў для ізаляваных лекараў і медперсаналу. Групу кантактнікаў другога ўзроўню размясцілі ў карпусах катэджу альбо накіравалі на самаізаляцыю дадому.

У бальніцы вызваляюць усе аддзяленні, у тым ліку дзіцячае (учора выпісалі апошніх 9 дзяцей). Яшчэ не выехала некаторая колькасць дарослых пацыентаў (відавочна з больш далёкіх рэгіёнаў) і 2 пацыенты з платнага аддзялення. Корпус максімальна ізалявалі. У дзіцячае аддзяленне хадзілі па пажарнай лесвіцы. Але ўсё роўна тыя медработнікі, хто кантачыць з захварэлым пацыентам, доўгі час не ведалі, што ён хворы. Так што небяспека ўспышкі вельмі высокая.

Трэба ўлічыць, што большасць работнікаў бальніцы жывуць у прылеглым пасёлку. А тыя, каго паклалі ў катэджах (кантакты 2-га ўзроўню) не могуць строга кантралявацца. І якія пражываюць у пасёлку, адпраўленыя на самаізаляцыю, і «ізаляваныя» ў катэджах працягваюць наведвацца ў мясцовыя крамы. І, калі шчыра, нам усім вельмі страшна».