Мянчук з каранавірусам: Кладуць усіх запар у адну палату, не ахаваўшы нават шырмай

Што цяпер адбываецца ў 6-й гарадской клінічнай лякарні Менска?

Тэлеграм-канал «Баста» апублікаваў відэа ад менчука Дзмітрыя Касцючэнкі, пра якога мы ўжо пісалі раней і ў якога пацвердзілі дыягназ Covid-19. Учора яго перавезлі ў 6-ю гарадскую клінічную лякарню Менска.

«Да гэтага быў у 4-й лякарні цэлы тыдзень, у ёй умовы былі лепшыя, - распавёў Дзмітрый журналісту канала «Баста». - Сюды [у 6-ю лякарню] прыехаў адзін з першых, было надзвычай холадна, проста надта. Кроў брала практыкантка, не адразу атрымалася. Кладуць усіх запар у адну палату, не ахаваўшы адзін ад аднаго нават шырмай, туалет агульны і не закрываецца.

У палаце са мной чалавек, у якога таксама «карона». Ёсць яшчэ адно засланае месца, пакуль на ім нікога.

Спытаў у лекараў, што рабіць, калі маё захворванне будзе праходзіць бессімптомна, а ў маіх сукамернікаў цяжка. Адказ: «Ну а што мы можам зрабіць?»

Як мінімум страшна, што мая дзяўчына, яе мама і яе бабуля, якой дарэчы ўжо 93 гады, прайшлі тэст, вынік адмоўны і толькі мой - станоўчы. Але я не думаю, што ў мяне настолькі слабы імунітэт.

Гэтак жа насцярожвае думка, што заразіўся, пакуль знаходзіўся ў шпіталі.

Сям'я вельмі турбуецца, але добра, што ёсць магчымасць перадаваць перадачы».