Улады заявілі аб заражэнні каранавірусам дзясяткаў лекараў у Віцебску

Сярод іх - галоўны лекар паліклінікі.

У Віцебскай вобласці 38 медыцынскіх работнікаў заразіліся каранавірусам. Гэтыя звесткі агучылі 7 красавіка на пасяджэнні абласнога аператыўнага штаба абароны ад COVID-19, піша tut.by. Большасць з тых, хто захварэў - у Віцебску.

Акрамя таго, многія медработнікі адсутнічаюць на працы - праз тое што хварэюць на іншыя вірусныя інфекцыі і на запаленне лёгкіх. «І сёння гэта - вялікая праблема для ўсіх рэгіёнаў вобласці», - адзначаюць на абласным тэлеканале.

Сродкаў індывідуальнай абароны для медыкаў у Віцебскай вобласці «востра не стае», адзначылі на пасяджэнні аператыўнага штаба ў барацьбе з COVID-19.

7 красавіка аператыўны штаб пастанавіў, што сродкі індывідуальнай абароны (рэспіратар, камбінезон) павінны мець не толькі медработнікі ў стацыянарах, але і ўсе супрацоўнікі хуткай дапамогі і паліклінік.

Адзін з тых, хто захварэў - галоўны лекар паліклінікі наваполацкага завода «Нафтан» Сяргей Чубрык.

«Пасля першага папярэдняга тэста, праведзенага медыкамі, галоўны лекар завадской паліклінікі Сяргей Чубрык мае станоўчы вынік на каранавірус. Ён быў ізаляваны. Дзякуючы распрацаваным мерам удалося імгненна выявіць кантакты першага ўзроўню, якія неадкладна самаізаляваліся. Работнікі, якія належаць да кантактаў першага ўзроўню, прайшлі тэст на каранавірус, ён даў адмоўны вынік», - адзначае выданне «Вестник Нафтана».

Варта адзначыць, што ў Беларусі дагэтуль не ўведзены захады карантыннага характару. Праходзяць масавыя спартыўныя і культурныя мерапрыемствы.

Незалежныя СМІ і блогеры адзначаюць, што выпадкаў заражэння і смерці ад каранавіруса ў Беларусі значна больш, чым нам паведамляе Міністэрства аховы здароўя.