Уладзімір Зяленскі: Пік захворвання ва Украіне яшчэ наперадзе

Большасць украінцаў падтрымлівае карантын.

Прэзідэнт Украіны Уладзімір Зяленскі заявіў, што большасць украінцаў падтрымліваюць карантын, але пік захворвання на каранавірус яшчэ наперадзе.

Пра гэта Зяленскі заявіў на нарадзе ў барацьбе з каранавірусам, на якой, сярод іншага, абмяркоўвалася падрыхтоўка да святкавання Вялікадня, піша «Новы час».

Як адзначыў прэзідэнт, 70% грамадзянаў Украіны падтрымліваюць захады карантыну і толькі 3% збіраюцца наведаць царкву.

Апытанне: большасць украінцаў падтрымалі падаўжэнне карантыну, меркаванні пра эфектыўнасць уладаў падзяліліся

«Гэта выдатна, што ўкраінцы такія адказныя, і большасць грамадзянаў усведамляе высокія рызыкі эпідэміі. Бо пік яшчэ наперадзе. Таму трэба зрабіць усё магчымае, каб і 3% вернікаў не зазналі небяспекі», – сказаў Зяленскі.

На стан 9 красавіка ў Кіеве колькасць пацверджаных выпадкаў заражэння каранавірусам склала 355, за суткі выявілі 41 новы выпадак, 26 з іх – у Кіева-Пячэрскай Лаўры.

Ва Украіне зафіксаваныя 224 новыя выпадкі заражэння каранавірусам, у цэлым пацверджаныя 1892 выпадкі інфікавання. 45 пацыентаў паправіліся, 57 памерлі ад ускладненняў.

Згодна з прагнозам Міністэрства аховы здароўя, пік захворвання на каранавірус ва Украіне чакаецца 14–15 красавіка.