Карантын у інтэрнаце БНТУ: у студэнткі праз месяц недамагання выявілі каронавірус

Даведку ёй адкрылі толькі ў канцы сакавіка.

Сёння ў шостым інтэрнаце БНТУ перапалох: у студэнткі выявілі каранавірус. Са слоў дзяўчыны, яна хварэла больш за месяц, але даведку ёй адкрылі толькі ў канцы сакавіка. Калі мама забіла ў званы, дзяўчыне зрабілі тэст, які апынуўся станоўчым на COVID-19. У рэктараце сцвярджаюць, што дзяўчыну ўжо забрала хуткая, аднак сама студэнтка і іншыя навучэнцы зняпраўджваюць гэтую інфармацыю - з іх слоў, дзяўчына ўжо шмат гадзін знаходзіцца ў інтэрнаце з тых часоў, як даведалася пра свой дыягназ. У любым выпадку, з сённяшняга дня ў «шасцёрцы» карантын: са слоў рэктара, студэнтаў будуць выпускаць толькі ў найбліжэйшую краму на 20 хвілін. Ля дзвярэй інтэрната дзяжурыць служба аховы, піша «Онлайнер».

Студэнтка адчула недамаганне, калі ў інтэрнаце БНТУ ўвялі карантын, гэта значыць прыкладна 28 лютага. Дзяўчыне было дрэнна даслоўна з першага дня, яна адчувала жар і недамаганне. Усім студэнтам у інтэрнаце вымяралі тэмпературу - і ёй у тым ліку, аднак, са слоў студэнткі, медыцынскія работнікі не рабілі захадаў. 10 сакавіка карантын у БНТУ скончыўся, і студэнтаў вярнулі на заняткі. Тэмпература ў дзяўчыны перыядычна падымалася то да 37,6, то да 38,2 градуса.

Дзве даведкі, страта прытомнасці і ЧМТ

31 сакавіка студэнтка сама адправілася ў медпункт, дзе ёй адкрылі даведку да 2 красавіка. Пазней даведку працягнулі да 6 красавіка, а 6 красавіка закрылі. У той жа дзень дзяўчына страціла прытомнасць, рассекла галаву - яе павезлі ў другую бальніцу. Зашылі, сказалі схадзіць у паліклініку да хірурга і неўролага. Дыягназ - чэрапна-мазгавая траўма першай ступені, выцятая рана галавы, стан пасля страты прытомнасці. Адкрылі новую даведку.

- На наступны дзень мая мама прыехала ў Менск і пайшла са мной у паліклініку: зразумела, што прытомнасць, хутчэй за ўсё, страчвала праз каранавірус. Мы схадзілі ў інфекцыйнае аддзяленне - нам сказалі, што тэстаў няма, і мама зноў з усімі пасварылася. Нас папрасілі выйсці на тры хвіліны. Калі вярнуліся, яны ўжо былі ў поўнай экіпіроўцы: зрабілі тэст і паабяцалі патэлефанаваць да нядзелі. Патэлефанавалі сёння днём і паведамілі, што ў мяне станоўчы аналіз на каранавірус і што 27 лекараў, якія са мной кантактавалі, знаходзяцца на карантыне.

З таго моманту прайшло блізу пяці гадзін. У рэктараце кажуць, што дзяўчыну ўжо забрала хуткая, яна сама і іншыя студэнты зняпраўджваюць гэтую інфармацыю

- Адзінае, што сказалі: сабраць рэчы на 14 дзён. Я сабрала, сяджу чакаю: то рукі трасуцца, то слёзы, тэмпература паднялася ад панікі, - распавядала дзяўчына, пакуль знаходзілася ў інтэрнаце БНТУ. - Супакоілася, п'ю таблеткі, збіваюць тэмпературу.

Са слоў студэнткі, сітуацыя ў інтэрнаце цяпер панічная: служба бяспекі не выпускае студэнтаў з будынка, але некаторыя навучэнцы скачуць з акна другога паверха, каб з'ехаць дадому - зноў жа, са слоў дзяўчыны. Студэнтам сказалі не выходзіць у калідор без масак і пальчатак. Дазволена паліць у туалетах, але ўваход у «курылку» толькі па адным. Сама студэнтка, якой сёння паведамілі аб тым, што ў яе пацвердзіўся тэст на COVID-19, да прыезду хуткай таксама магла выходзіць з пакоя ў сродках індывідуальнай абароны.

- А 15:00 пачалося пасяджэнне ў рэктараце з нагоды мяне і каб нас нарэшце перавялі на дыстанцыйнае навучанне, - кажа дзяўчына.

Учора да захварэлай прыязджаў бацька. Пасля таго як прыйшоў станоўчы тэст на COVID-19, бацькі сышлі на самаізаляцыю, ім таксама паабяцалі зрабіць тэст. Дзяўчына паведаміла медыкам аб усіх, з кім кантактавала ў апошні месяц - іх аказалася пяць чалавек. У дваіх такія ж сімптомы, як і ў яе самой: страта смаку і нюху. Сёння ў пакой да яе прыехала суседка, цяпер яе таксама ізалююць і зробяць тэст. На працягу гэтага месяца дзяўчына выходзіла толькі па прадукты і да лекара. Сцвярджае, што ўвесь час была ў масцы.

Інтэрнат закрыты. Каментар БНТУ

- Не, месяц яна не хварэла, - апісвае сітуацыю першы прарэктар БНТУ Георгій Вяршыня. - Даведку ёй адкрылі ў канцы сакавіка. Далейшыя дзеянні вельмі простыя: мы будзем прытрымлівацца пастановы ўрада. Інтэрнат будзе знаходзіцца на самаізаляцыі. Ён будзе закрыты, студэнты будуць знаходзіцца па месцы пражывання і ні пры якіх абставінах не змогуць з'ехаць дадому. У іх будзе 20 хвілін схадзіць у найбліжэйшую краму. Ёсць буфет, мы самі арганізуем дастаўку - пытанне ўжо прапрацаванае. Навучальны працэс будзе арганізаваны па індывідуальным графіку карыстання інфармацыйна-камунікацыйных сродкаў: дзесьці з дапамогай відэасувязі, дзесьці - праз вебінар. Падчас карантыну ў інтэрнаце будзе дзяжурыць ахова - гэта ў інтарэсах грамадства і дзяржавы. Калі за 14 дзён ні ў каго з абітурыентаў не выявяць каранавірус - карантын здымуць.