6 чэрвеня 2020, Субота, 23:43
Сім сім, Хартыя 97!
Рубрыкі

Кошты газу ў Еўропе абрынуліся ніжэй за адзнаку рэнтабельнасці «Газпрома»

27
Кошты газу ў Еўропе абрынуліся ніжэй за адзнаку рэнтабельнасці «Газпрома»

$52 за тысячу кубаметраў каштуе газ на хабе TTF у Нідэрландах.

Еўрапейскі рынак газу прадаўжае імкліва каціцца па нахільнай уніз і абнаўляе гістарычныя мінімумы на фоне прытоку ЗПГ, перапоўненых сховішчаў і карантынных захадаў, паведамляе finanz.ru.

На найбуйнейшым газавым хабе ЕЗ - TTF у Нідэрландах - кошт газу з пастаўкай на наступны дзень абрынуўся да 53,7 даляра за тысячу кубаметраў. Гэта на 20% менш, чым у канцы красавіка, і ўтрая ніжэй за ўзроўні гадавой даўнасці.

Кантракты на пастаўку ў канцы тыдня падалі яшчэ ніжэй - да 52 даляраў за тысячу кубоў. Ледзь даражэй - 71 даляр за тысячу кубаметраў - газ каштуе на аўстрыйскім хабе Баўмгартэн, які з'яўляецца найбуйнейшым размеркавальным пунктам расейскіх паставак у Еўропу.

Спотавыя газавыя кошты на еўрапейскім рынку ўжо амаль месяц трымаюцца ніжэй за ўнутрырасейскія ва ўсіх рэгіёнах, акрамя здабыўных - гэта Ямала-Ненецкая і Ханты-Мансійская аўтаномныя акругі, Рэспубліка Комі, а таксама Цюменская і Курганская вобласці.

Больш за тое, існыя каціроўкі прыкметна ніжэйшыя за адзнаку рэнтабельнасці «Газпрома», у якога толькі падаткі і транспартаванне кожнай тысячы кубаметраў паліва «з'ядаюць» як мінімум 63 даляры, адзначае «Інтэрфакс».

Так, блізу тысячы рублёў на тысячу кубаметраў (14 даляраў) складае ПЗКВ, 27 даляраў - выдаткі на транспарт па Расеі, мінімум 22 даляры каштуе транспартаванне ў ЕЗ па самым танным з маршрутаў - «Паўночнаму струменю-1».

Калі ж улічыць сабекошт здабычы і экспартныя падаткі, то «Газпрому» патрэбны кошт, блізкі да 100 даляраў за тысячу кубаметраў.

Каб паменшыць выдаткі, «Газпром» гандлюе пастаўкамі з вялікай адтэрміноўкай - на лета, восень і 2021 год, адзначаюць экспэрты Цэнтра энэргетыкі Сколкава. Аднак ахвяраваць прыходзіцца аб'ёмамі: за студзень-красавік пастаўкі ў Еўропу ўпалі на 20%.

У выніку нішы «Газпрома» паступова займае ЗПГ: з пачатку года ў ГТС Еўропы было пастаўлена 39,5 мільярдаў кубаметраў звадкаванага газу - на 16% больш, чым год таму. Пастаўкі нарвежскага газу пры гэтым практычна не змяніліся - 38 млрд кубоў супраць 40 млрд годам раней.

Падняць кошты вышэй за 100-даляравы парог «Газпрому» не атрымалася: у красавіку сярэдні кошт рэалізацыі на электроннай гандлёвай пляцоўцы (ЭТП) склаў 97 даляраў за тысячу кубаметраў.

Сітуацыя на рынку газу «прадаўжае заставацца катастрафічнай», пішуць аналітыкі «Промсувязьбанка». На 28 красавіка ў ПСГ Еўропы знаходзілася 66 мільярдаў кубаметраў, што на 15 млрд кубоў, або 29% вышэй за мінулагодні ўзровень.

«На фоне слабага попыту і запоўненых сховішчаў аднаўленне цэнавай кан'юнктуры чакаецца не раней за наступны год», - папярэджваюць у ПСБ.

На ўласны прагноз «Газпрома», сёлета продажы газу ў Еўропу ўпадуць на 17%, да 165 мільярдаў кубаметраў, а сярэдні кошт абрынецца на траціну, да 133 даляраў. Такім чынам «Газпром» можа страціць да 20 млрд даляраў экспартнага прыбытку, ацэньвае «Райффайзенбанк».

Гэта ўдарыць па бюджэце кампаніі, які нагружаны шматмільярдным мегабудоўлямі і ўжо летась атрымаў касавы разрыў на 190 млрд рублёў. У 2020-м «Газпрому» давядзецца пазычыць да 10 млрд даляраў, каб збалансаваць адмоўную грашовую плынь, прагназуе Fitch.