Зяленскі падпісаў «антыкаламойскі закон»

Закон забараняе вяртаць «Прыватбанк» яго былым уладальнікам.

Прэзідэнт Украіны Уладзімір Зяленскі падпісаў закон аб удасканаленні механізмаў рэгулявання банкаўскай дзейнасці, які забараняе вяртанне нацыяналізаваных банкаў ранейшым уладальнікам. Пра гэта паведамляецца на сайце кіраўніка ўкраінскай дзяржавы.

«Законам уводзяцца абноўленыя механізмы вываду банкаў з рынку, накіраваныя на ўдасканаленне ліквідацыйнай працэдуры і задавальнення патрабаванняў як мага большай колькасці крэдытораў банка, а таксама механізмаў магчымага ўдзелу дзяржавы ў вывядзенні банка з рынку. Такі крок будзе спрыяць надзейнасці і стабільнасці банкаўскай сістэмы, аднаўленню даверу да яе з боку ўкладчыкаў і крэдытораў», - гаворыцца ў паведамленні.

У Офісе прэзідэнта Украіны падкрэслілі, што рэалізацыя закона «павысіць якасць і эфектыўнасць выканання Нацыянальным банкам сваіх функцый у сферы банкаўскага рэгулявання і нагляду, а таксама дапаможа завяршыць працэдуры вываду з рынку або ліквідацыі тых банкаў, пастановы паводле якіх скасаваныя судамі».

Прыняцце банкаўскага закона і адкрыццё рынку зямлі былі галоўнымі патрабаваннямі Міжнароднага валютнага фонду для працягу супрацоўніцтва з Украінай.

Сярод іншага падпісаны Зяленскім закон выключыць магчымасць вяртання «Прыватбанк», нацыяналізаванага ў 2016 годзе, бізнэсоўцу Ігару Каламойскаму, які спрабуе аспрэчыць нацыяналізацыю ў судах. У адпаведнасці з палажэннямі дакумента былыя ўласнікі нацыяналізаваных банкаў могуць разлічваць толькі на грашовую кампенсацыю.