2 чэрвеня 2020, aўторак, 17:28
Сім сім, Хартыя 97!
Рубрыкі

Памерла кінарэжысёрка Любоў Зямцова, якая здымала фільм пра валанцёраў, якія дапамагаюць медыкам

13
Памерла кінарэжысёрка Любоў Зямцова, якая здымала фільм пра валанцёраў, якія дапамагаюць медыкам
ЛЮБОЎ ЗЯМЦОВА
ФОТА: FACEBOOK.COM/GROUPS/B2BDOC

Ёй было 28 гадоў.

Кінарэжысёрка Любоў Зямцова памерла сёння раніцай, 22 траўня ў лякарні. Інфармацыя пра гэта з'явілася ў фэйсбуку, у групе, прысвечанай дакументальнаму кіно, піша tut.by.

14 траўня 2020 года Любоў і ейныя калегі, аўтары дакументальнага праекта «Неизвестная Беларусь», які выходзіць на тэлеканале «Настоящее Время», трапілі ў ДТЗ у Пухавіцкім раёне на 43-м км трасы М5 Менск - Гомель.

Следчыя высветлілі, што на паласу, дзе ехаў Citroen, з сустрэчнай паласы выскачыў Rover, за стырном якога быў 20-гадовы жыхар Гомеля. У выніку ДТЗ у Citroen загінулі 33-гадовы рэжысёр Уладзімір Міхайлоўскі і 26-гадовы мастак-гукарэжысёр Максім Гаўрыленка, загінуў таксама кіроўца Rover. Пасажыр Rover і рэжысёрка Любоў Зямцова былі шпіталізаваныя. Любоў ў цяжкім стане патрапіла ў рэанімацыю, дзе лекары да сённяшняга дня змагаліся за ейнае жыццё.

Паводле факту здарэння СК распачаў крымінальную справу паводле ч. 3 арт. 317 (Парушэнне ПДР, што пацягнула з неасцярожнасці смерць трох асоб) КК Беларусі.

Любоў Зямцова нарадзілася ў Менску ў сям'і тэлевізійнага рэдактара і сцэнарыста Святланы Зямцовай. У 17 гадоў на базе «Дзіцячага цэнтра тэхнічнай творчасці», дзякуючы свайму выкладчыку Г. Злабенку, зняла першую эксперыментальную працу «Клетка». У 2014 скончыла Акадэмію мастацтваў (спецыяльнасць: рэжысура дакументальнага фільма, майстэрня М. Жданоўскага), пазней школу Wajda School Doc Pro ў Варшаве.

Зняла стужкі: «Дзень Перамогі», «Месца кахання», «Пра каханне: Іра», а таксама цыкл з чатырох выпускаў «Неизвестная Беларусь». Гэта серыя дакументальных фільмаў тэлеканала «Настоящее Время» пра адметных беларусаў, незвычайныя месцы, цікавыя з'явы, якія робяць нашу краіну ўнікальнай. У рамках праекта выйшлі тры серыі па 24 хвіліны. Чацвёртым у цыкле павінен быў стаць фільм пра гомельскіх валанцёраў, якія дапамагаюць медыкам. Але дарабіць стужку аўтары не паспелі.

Рэдакцыя спачувае родным і блізкім.