Аўстрыя разгарнула на мяжы вайскоўцаў рэгулярнай арміі
1- 22.05.2020, 14:41
- 24,653
Гэта ўпершыню адбываецца ў пасляваеннай гісторыі краіны.
З пятніцы 22 траўня ўпершыню ў гісторыі пасляваеннай Аўстрыі чальцы рэгулярнай арміі (Milizsoldaten) будуць ахоўваць мяжу са Славакіяй, Вугоршчынай і Славеніяй на фоне пандэміі каранавірусу.
Пра гэта паведамляе "Еўрапейская праўда" са спасылкай на ORF.
Гаворка ідзе пра разгортванне блізу 500 вайскоўцаў. Яны будуць выконваць задачы ў сферах міграцыі і барацьбы з COVID-19. Сярод іншага, дапамагаючы праводзіць мерапрыемствы ў ахове здароўя ў кантэксце памежнага кантролю, абвесціла вайсковае камандаванне федэральнай зямлі Бургенланд.
Яны таксама павінны рэгуляваць рух на часовых памежных пасадах і прадухіляць несанкцыянаванае перасячэнне мяжы.
Акрамя таго, вайскоўцаў разгарнулі ў федэральнай зямлі Ніжняя Аўстрыя на межах з Чэхіяй і Славакіяй.
Межы Аўстрыі з Чэшскай Рэспублікай, Славакіяй і Вугоршчынай будуць цалкам адкрытыя 15 чэрвеня. Раней таксама было абвешчана пра поўнае скасаванне памежнага кантролю паміж Нямеччынай, Аўстрыяй, Швэйцарыяй і Ліхтэнштэйнам з 15 чэрвеня.
Эканоміка Аўстрыі моцна залежыць ад індустрыі турызму, асабліва з Нямеччыны. Краіна спадзяецца правесці летні турыстычны сезон, прывабліваючы адпачывальнікаў з краінаў з добрай эпідэмічнай сітуацыяй.