Бацькі – Міністэрству адукацыі: Вы забарыкадаваліся ў сябе ў кабінетах і збіраецеся сагнаць дзяцей на іспыты

Беларусы патрабуюць скасаваць школьныя экзамены для 9-ых і 11-ых класаў і перанесці тэрміны ўступнай кампаніі.

Бацькі выпускнікоў - пісьменніца і мама дзевяцікласніцы Яўгенія Пастэрнак і заснавальнік рэпетытарскага цэнтра «100 балаў» Яўген Лівянт - напісалі адкрыты ліст Міністэрству адукацыі і Лукашэнку. Зварот, апублікаваны на сайце petitions.by ў пятніцу, за некалькі гадзін падпісалі 3594 чалавекі (паводле стану на 20.00 22 траўня - заўв.), піша «Салідарнасць».

Аўтары ліста звяртаюць увагу на тое, што ўсе нашы суседзі перайшлі на дыстанцыйнае навучанне.

«Беларусь - адзіная краіна, якая гэтага не зрабіла, але не таму, што так лепш ці так правільна. Гэта адбылося таму, што Міністэрства не змагло нічога зрабіць. Наогул нічога. Зрабіць выгляд, што школы працуюць, - гэта не рашэнне, гэта не выйсце.

Вы колькі заўгодна можаце рапартаваць пра тое, што ў школах знаходзіцца сорак працэнтаў вучняў, але бацькі ж не ідыёты. У нас ёсць знаёмыя і сябры, і дзеці вучацца ў розных школах.

І немагчыма схаваць рэальнае становішча спраў, нават калі вельмі моцна маўчаць. Таму што, калі дзесяць настаўнікаў з адной школы ляжаць у лякарні з запаленнем лёгкіх, пра гэта немінуча даведаюцца ўсе бацькі. І бацькі ведаюць».

Аўтары петыцыі ўпэўненыя, Міністэрства адукацыі не справіцца з бяспечным правядзеннем іспытаў.

Нагадаем, на днях журналісты атрымалі адказ на свой зварот у Міністэрства адукацыі, у якім гаварылася: выпускныя іспыты ў школах збіраюцца правесці ў запланаваныя тэрміны.

Аўтары петыцыі назвалі пяць прычын, чаму Міністэрства адукацыі павінна скасаваць школьныя іспыты:

«Таму што вы не ў стане забяспечыць: адсутнасць на экзамене кантактаў 1 узроўню сярод настаўнікаў і вучняў; адэкватны пандэміі санітарны стан памяшканняў; падзел плыняў навучэнцаў; дыстанцыю паміж навучэнцамі; праверку здароўя навучэнцаў».

- Вы збіраецеся сагнаць больш за сто дзяцей і некалькі дзясяткаў настаўнікаў у адзін будынак. Супрацоўнікі міністэрства адукацыі! Вы забарыкадаваліся ў сябе ў кабінетах і адгарадзіліся ад наведвальнікаў сталамі! А вы ж асабіста павінны адказваць за кожнага настаўніка, які цяпер ляжыць з запаленнем лёгкіх у бальніцы.

Бацькі выпускнікоў уважаюць, што некантралюемая ўспышка COVID-19 пасля экзаменаў - занадта дарагая цана за тое, што чыноўнікі міністэрства не могуць прыняць рашэнне.

Яны заклікаюць атэставаць вучняў па трох чвэрцях, скасаваць школьныя экзамены для дзявятых і адзінаццатых класаў і перанесці тэрміны ўступнай кампаніі:

«Будзьце людзьмі! Адарвіцеся ад сваіх справаздач, вярніцеся ў рэальнае жыццё. У нас тут складана, затое вакол жывыя людзі. Пакуль жывыя...»

У каментарах зварот бацькоў падтрымалі.

Маргарыта: «Калі б я загадала сагнаць 20-25 вучняў з настаўнікамі ў палату з каранавірусным хворым гадзінкі на 3-4, то мяне можна назваць апошнім мярзотнікам і стварэннем. Аднак калі я аддам загад правесці іспыт падчас пандэміі, то мяне ўжо можна назваць беларускім міністэрствам адукацыі.

Немагчыма прадбачыць, ці ёсць сярод дзяцей ці настаўнікаў інфікаваныя. Сабраць усіх у маленькім памяшканні тое самае, што і запусціць бомбу запаволенага дзеяння».

Аляксандра: «Я заканчваю 11 клас і, шчыра кажучы, больш за ўсё хвалююся за сваю будучыню і будучыню сваіх аднагодкаў. Няцяжка ўявіць, як некаторыя заразяцца найбліжэйшыя дні, ці будуць кантактаваць з чалавекам, у якога станоўчы тэст. Ясная справа, вучня змесцяць на самаізаляцыю на два тыдні, а то і больш, і гэты тэрмін прыпадае як раз на перыяд выпускных экзаменаў.

Што рабіць? Дапускаць у адзін кабінет да астатніх яго нельга, значыць, ён павінен перапісваць і пераздаваць іспыты ў жніўні. Значыць, дарога ў ВНУ і каледжы гэтаму няшчаснаму зачыненая сёлета, а калі гэта яшчэ і юнак, то яму прамы шлях у войска.

Аналагічная сітуацыя і з ЦТ. Калі абітурыент на самаізаляцыі ў перыяд правядзення экзаменаў - ён пралятае. Нават пры наяўнасці рэзервовых дзён. Іх толькі два. Мне вельмі шкада тых, хто трапіць у гэты сцэнар, і вельмі страшна самой туды патрапіць».