Аргенціна апынулася ў стане дэфолту

Урад прапусціў усе тэрміны выплаты адсоткаў у бондах.

Праз нявыплаты вонкавай пазыкі Аргенціна апынулася ў стане дэфолту. Урад краіны не выплаціў $ 500 млн – адсоткі ў трох серыях бондаў і не змог дамовіцца з крэдыторамі пра рэструктурызацыю завінавачанасці а 17-й 22 траўня паводле нью-ёркскага часу, паведамляе korrespondent.net.

Разам з тым афіцыйныя крыніцы выдання ва ўрадзе паведамляюць, што краіна прадаўжае перамовы з крэдыторамі пра рэструктурызацыю завінавачанасці.

"Мы не плацім, але перамовы прадаўжаюцца", – заявіла крыніца.

Тэрмін выплаты адсоткаў у бондах скончыўся 22 красавіка, але ва ўрада Аргенціны было 30 дзён на тое, каб дамовіцца пра рэструктурызацыю часткі вонкавай пазыкі – $ 65 млрд. Перамовы пацярпелі крах, і ўрад абвесціў, што падаўжае да 2 чэрвеня тэрмін дзеяння прапановы да крэдытораў.

Фінансавыя аналітыкі тым часам заяўляюць, што некантраляванага дэфолту не будзе, паколькі ў Аргенціны няма за мяжой такой колькасці актываў, каб за кошт іх арышту можна было пакрыць усе запазычанасці ў выпадку адначасовага прад'яўлення бондаў на датэрміновую выплату. Паводле ўмоваў гэтыя аблігацыі павінны быць пагашаныя ў 2021, 2026 і 2046 гадах.

Цяперашні фактычны дэфолт – дзявяты ў гісторыі краіны. Папярэдні дэфолт Аргенціны быў зафіксаваны ў 2014 годзе. Самы маштабны адбыўся ў 2001 годзе, ён прывёў да масавых бунтаў у краіне, а таксама выключэння Аргенціны з міжнародных пазыковых рынкаў да 2016 года. Але ўжо ў 2017 годзе Аргенціна нечакана здолела размясціць 100-гадовыя даляравыя аблігацыі, якія выклікалі вялікую цікавасць інвестараў.

Нагадаем, у лютым Аргенціна адмовілася плаціць пазыкі МВФ да выхаду з рэцэсіі. Фонд, у сваю чаргу, адмовіўся спісваць пазыкі краіны.