У Менску фантан за 2 мільёны рублёў затапіў набярэжную адразу пасля запуску

Высветлілася, што фантан - не фантан.

Фантан на вуліцы Пуліхава запусцілі 8 траўня. Планавалася, што зіхатлівыя на сонцы бруі будуць доўга радаваць гараджан, аднак характар у новай устаноўкі аказаўся залішне свавольным: замест таго каб цыркуляваць па вызначаным крузе, вада бегла ў бок Свіслачы, паралельна затапіўшы частку набярэжнай. Веладарожка прамокла, на плітцы ўтварыліся лужыны (высветлілася, што фантан - не фантан). Але праблему, відаць, усё ж выправяць: ля выключанага аб'екта былі заўважаныя рабочыя, піша «Онлайнер».

Фатаграфіі людзей, што «чаруюць» на набярэжнай з'явіліся ў Telegram-канале. «Дарабляюць фантан на Пуліхава, каб вада не злівалася на ходнік і роварную дарожку. Ну, хоць праз месяц пасля адкрыцця», - гаворыцца ў паведамленні.

Нагадаем, мяркуючы па інвестыцыйнай праграме на 2020 год, на будаўніцтва фантана збіраліся выдаткаваць 2,185 млн руб. Як і меркавалася, у яго тры плоскасныя чары ўпоравень з ходнікам. Раней на гэтым месцы хацелі пабудаваць культурна-забаўляльны цэнтр з рэстарацыяй, але праект быў сустрэты пратэстам мясцовых жыхароў і эколагаў. У выніку ўлады горада не сталі заключаць дамову з інвестарам і рэканструявалі фантан.