28 лютага 2021, Нядзеля, 22:22
Сім сім, Хартыя 97!
Рубрыкі

Леанід Судаленка: У Гомелі нельга зрабіць тэст на каранавірус нават платна

25
Леанід Судаленка: У Гомелі нельга зрабіць тэст на каранавірус нават платна
ЛЕАНІД СУДАЛЕНКА
ФОТА: ГОМЕЛЬСКАЯ ВЕСНА

Як вядомы праваабаронца сутыкнуўся з рэаліямі беларускай медыцыны падчас эпідэміі.

«Апошні раз тэмпература падымалася гадоў 10 таму. Апошнія некалькі дзён — 39 увечары, удзень — да 37», — напісаў у «Фэйсбуку» прававы інспектар незалежнага прафзвязу РЭП Леанід Судаленка. Сайт Charter97.org даведаўся, як сябе адчувае вядомы праваабаронца:

- Адчуваю сябе дрэнна. Дзесьці ў сярэдзіне дня мінулай суботы я адчуў недамаганне і ўжо да вечара ў мяне была досыць высокая тэмпература. Прымаў антыбіётыкі, спрабаваў справіцца з гарачкай. Думаў, што гэта простае ВРВІ, бо ў маёй сям'і ўжо ўсе перахварэлі. Цяпер захварэў і я.

За тры дні нічога не змянілася, гэта значыць, што ёсць праблемы. Я выклікаў лекара на дом, бо ісці ў паліклініку ў мяне вялікага жадання не было. Прыехала лекарка з раённай лякарні ў спецыяльным камбінезоне і выпісала мне лісток непрацаздольнасці, бо ў мяне было прызначанае на чацвер судовае пасяджэнне, якое сакратарка не хацела пераносіць.

Пасля таго, як я спытаў аб сітуацыі з каранавірусам, лекарка мяне адправіла ў Міністэрства аховы здароўя. Відавочна, яна нейкія распіскі давала, каб не выдаваць.

Умоўна кажучы, калі б ведаў, што ў мяне каранавірус, паехаў бы і лёг у стацыянар. Але паколькі ў мяне ніякіх прыкмет няма, я звярнуўся да лекара, учора пайшоў у паліклініку, зрабіў рэнтген лёгкіх.

Нібыта ўсё нармальна: лёгкія светлыя, дыханне нармальнае, кашлю няма. Але некаторыя кажуць, што на ранніх стадыях маленькая імавернасць выявіць СOVID-19 пасля флюараграфіі.

Тэмпература трымаецца. У пятніцу зноў пайду да лекара і там ужо буду думаць, што рабіць. Калі гарачка не спадзе, трэба будзе ехаць у стацыянар, шукаць прычыну.

Мне паставілі дыягназ ВРВІ. Як кажуць лекары, нават калі сёння скажуць, што ў мяне каранавірус, усё адно лячыць будуць сімптомы: калоць антыбіётыкі, даваць тыя ж лекі, што і пры запаленнях. Усё адно мяне б лячылі як ад пнеўманіі, бо супраць каранавіруса яшчэ няма спецыяльных лекаў.

Дзе я мог заразіцца - складана сказаць, бо я з дзіцем увесь сакавік, красавік і травень былі на хатнім карантыне. Стараўся публічных месцаў не наведваць, не карыстаўся грамадскім транспартам. Калі я прыязджаў у суд, то на асабістым аўтамабілі. На мне заўсёды была маска і сродак для апрацоўкі рук з сабой.

Першай у мяне захварэла жонка, яна была вымушаная хадзіць на працу. Я падазраю, што яна прынесла інфекцыю.

- Вы рабілі тэст на COVID-19?

- На пытанне, дзе можна зрабіць тэст, лекарка сказала, што ў Гомелі вы нідзе яго не зробіце, нават платна. Іх проста пакуль не існуе. Здавалася б, што такое гэты тэст. Проста на нейкую палоску капнуць кроў і атрымаць вынік. Я так разумею, што для нашай дзяржавы, якая абвясціла сябе «IT-краінай» і з усякай нагоды трубіць пра гэта, тэсты на СOVID-19 - праблема.

Афіцыйна я не пісаў жа паперу на імя галоўнага лекара раённай паліклінікі з патрабаваннем забяспечыць мяне тэстам. Напэўна, калі тэмпература ў мяне за тыдзень не пройдзе, то я буду гэта рабіць.

У сярэдзіне траўня абяцалі запусціць усеагульнае тэставанне, каб кожны мог гэта зрабіць, але дзяржава да гэтага не гатовая. З іншага боку, для дзяржаўнай палітыкі «каранавіруснага псіхозу ў Драздах» статыстыка важнейшая за здароўе людзей. Як сказала сёння лекарка ў шпіталі, перахварэюць усе, пытанне толькі часу.

Гомельскую вобласць адной з апошніх цяпер «накрывае». Тое, што было ў пачатку ў Віцебскай вобласці, цяпер адбываецца ў нас. Цяпер яшчэ такое надвор'е: то сонца, то дождж. Самае падыходнае для распаўсюджвання розных інфекцый, не толькі «кароны».

- Атрымліваецца, што тэст могуць зрабіць толькі ў выпадку таго, калі чалавек знаходзіцца ў вельмі цяжкім стане?

- Так, калі я выклічу «хуткую» і яны ўбачаць, што мне цяжка дыхаць і я губляю прытомнасць, то мяне шпіталізуюць. Ужо на стацыянары зробяць КТ лёгкіх, якая на 90% пакажа рэальную сітуацыю. Падкрэсліваю, флюараграфія на раннім этапе можа не выявіць паразы. Наконт тэставання, яго няма. У найлепшым выпадку памераюць кісларод у крыві з пальца. Самае галоўнае сёння - гэта КТ. Але зноў жа, нават платна ніхто яго не зробіць, пакуль чалавек не ляжа ў стацыянар.

- Ці казалі вам лекары самаізалявацца або ўжыць нейкія захады для змяншэння кантактаў?

- Не, абсалютна ніякіх. Прыйшоў з паліклінікі, тэмпература была 38 градусаў, я адразу заснуў. І так гэтыя дні нікуды больш не хадзіў. Я сам быў, мяркуйце, на абсалютнай ізаляцыі. Лекары мне ніякіх прадпісанняў не давалі. Ім усё адно, як ты будзеш сябе паводзіць. Усё трымаецца на сумленным слове.

Я адказны чалавек, таму не пайду нікуды. У мяне былі запланаваныя два пасяджэнні, абодва адкладзеныя на чэрвень пасля таго, як падаў лісток непрацаздольнасці сакратарам. У такім стане, калі калоціць, лепш застацца дома і паляжаць, што я і раблю.

У майго калегі па офісе жонка хварэе на двухбаковую пнеўманію, але каранавірус не прызналі. Ён павінен быць у першай групе кантактаў, але да яго ніхто не прыехаў, ні пра што не папярэдзілі.

- Вы былі на прыёме ў Гомельскай паліклініцы. Раскажыце аб сітуацыі, шмат хворых?

- Я не быў унутры, таму складана сказаць, наколькі там забітыя палаты. Кажуць, што шмат людзей, што многія аддзяленні перапрафіляваныя, што людзі ляжаць у калідорах. Але гэта толькі словы.

На ўваходзе ў паліклініку стаяць медыкі ва ўбранні «касманаўтаў», мераюць тэмпературу. Для тых, у каго яна ёсць, зрабілі асобны ўваход. А далей — усюды расстаўленыя антысептыкі для рук. Лекарка, якая мяне прымала, казала, што ўвесь час праводзяць дэзінфекцыю ў калідорах. Там і пах стаіць спецыфічны. Маскі і пальчаткі не прымушаюць насіць. У калідорах сядзіць шмат людзей. Пад кожным кабінетам у тэрапеўта па 15-30 чалавек.

- Ці можна нейкімі юрыдычнымі механізмамі дамагчыся нармальнай дыягностыкі і лячэння каранавірусу?

- Няма ніякіх юрыдычных механізмаў, бо ў нашай краіне не ўводзіліся ніякія карантынныя мерапрыемствы, каб дзейнічаў, напрыклад, закон «Аб санітарна-эпідэміялагічнай сітуацыі». Нам казалі ў сакавіку пацярпець да Вялікадня, усё пройдзе. Пасля Вялікадня - пацярпець да 9 траўня. Пасля 9 траўня — «да канца траўня выйдзем на плато». Відавочна, наступны адпраўны пункт будзе 3 ліпеня.

Усё залежыць ад дзяржаўнай палітыкі. Калі міністр аховы здароўя ўзяў падпіскі з кожнага лекара і медсястры аб невыдаванні, хто ж скажа праўду. Яны, напэўна, ведаюць рэальную сітуацыю.