Маці пяцікласніка: Мінадукацыі не дрэмле і ўсімі сіламі заражае дзяцей

У ход ідуць самыя разнастайныя метады.

Прэс-служба грамадзянскай кампаніі «Еўрапейская Беларусь» апублікавала ліст маці школьніка, якая абураная тым, што ў той час, калі пандэмія каранавірусу ў Беларусі не сціхае, улады зноў спрабуюць арганізаваць масавы збор дзяцей.

– Сканчаецца навучальны год, які запомніўся тым, што пераважная большасць навучэнцаў апошнія месяцы засвойвае школьную праграму дома, у сувязі з імклівым распаўсюдам эпідэміі каранавірусу, – піша яна. – Пустыя школы сталі індыкатарам даверу ўладам.

Міністэрства адукацыі не дрэмле і ўсімі сіламі спрабуе сагнаць дзяцей у кучу, на гэты раз пры дапамозе дзіцячых летнікаў, як школьных, з дзённым знаходжаннем, так і на рэгулярнай трохтыднёвай аснове.

І калі ў пачатку пандэміі гаворка ішла пра тое, што дзеці хварэюць мінімальна, адзінкавыя выпадкі, то ўжо ў разгар эпідэміі з розных куткоў свету стала прыходзіць усё больш і больш інфармацыі, што маленькія пацыенты таксама цяжка пераносяць каранавірус, а ў некаторых выпадках справа заканчваецца смяротным зыходам.

У Беларусі сітуацыя пагаршаецца тым, што нашы дзеці схільныя да рызыкі з прычыны таго, што Чарнобыльская трагедыя не дае пра сябе забыцца, ды як дзеці, так і дарослыя не валодаюць дастатковым здароўем і імунітэтам.

Вось і падумайце: ці патрэбныя вашаму дзіцяці такія «адпачынак» і «аздараўленне»?