Беларусу, які абвінавачваў Лукашэнку ў смерці маці ад COVID-19, адмовілі ў распачынанні справы
13- 28.05.2020, 18:29
- 31,152
Мужчына звярнуўся ў міліцыю з просьбай прыцягнуць дыктатара за тое, што ён «не змог зберагчы беларусаў ад небяспечнай інфекцыі».
Аляксандру Матвееву, сыну 68-гадовай жыхаркі Полацка, якая 2 красавіка памерла ў Віцебску ад пнеўманіі з каранавірусам, адмоўлена ў распачынанні крымінальнай справы. Нагадаем, мужчына звярнуўся ў міліцыю з просьбай прыцягнуць прэзідэнта Аляксандра Лукашэнку за тое, што ён «не змог зберагчы беларусаў ад небяспечнай інфекцыі».
Афіцыйны прадстаўнік УУС Віцебскага аблвыканкама Вольга Шкуратава паведаміла tut.by:
- Паведамленні, якія паступілі ад грамадзяніна, разгледжаныя. Яму дадзены адказ на ўказаны адрас у Францыі, дзе ён жыве.
Аляксандр Мацвееў паведаміў, што гэты ліст ён яшчэ не атрымаў:
- Адказ мне пакуль яшчэ не прыйшоў. Але пра адмову ў распачынанні крымінальнай справы я ўжо ведаю са зносін у мэсэнджары з супрацоўнікамі полацкай міліцыі.
Нагадаем, Лідзія Матвеева, 68-гадовая жыхарка Полацка, памерла 2 красавіка ў Віцебскай абласной клінічнай бальніцы. У яе была вірусная пнеўманія і пацверджаны каранавірус. Сын жанчыны Аляксандр Мацвееў упэўнены, што яна заразілася ў бальніцы, куды паступіла з іншым захворваннем - дабраякаснай пухлінай хрыбетніка.
Мужчына напісаў заяву ў Полацкі РАУС - з патрабаваннем распачаць крымінальную справу ў дачыненні да прэзідэнта. Раней у інтэрв'ю Аляксандр Мацвееў растлумачыў, што ўладар, на яго думку, «не змог зберагчы беларусаў ад небяспечнай інфекцыі - і ад яе памерла мая маці».