Еўрадэпутаты заклікаюць улады Беларусі правесці дэмакратычныя і бяспечныя выбары

Еўрапарламентарыі таксама адзначылі мужнасць беларусаў на фоне няздольнасці ўладаў прыняць меры па COVID-19.

Дзесяць дэпутатаў Еўрапейскага парламента звярнуліся да беларускага народа са словамі салідарнасці ў перыяд пандэміі каранавіруснай інфекцыі COVID-19. Тэкст адкрытага звароту падалі БелаПАН супрацоўнікі офіса еўрапарламентарыя з Славакіі Мірыям Лексман.

Акрамя яе зварот падпісалі дэпутаты Іван Штэфанец (Славакія), Андрус Кубілюс і Пятрас Аўштравічус (Літва), Сандра Калніетэ (Латвія), Хэйдзі Хаўтала (Фінляндыя), Томаш Франкоўскую (Польшча), Сяргей Лагадзінскі і Райнхард Бютыкофер (Нямеччына), Зігфрыд Мурашан (Румынія).

Яны адзначылі, што пандэмія COVID-19 «стала прычынай беспрэцэдэнтных сацыяльных і эканамічных пагаршэнняў, спалучаных з трагічнай гібеллю людзей ва ўсім свеце».

«Будучы выбранымі сябрамі Еўрапейскага парламента і сябрамі беларускага народа, мы хацелі б выказаць сваё захапленне мужнасцю і рашучасцю, выяўленымі вамі ў гэтыя часы выпрабаванняў, якія, наколькі гэта магчыма, ураўнаважылі няздольнасць беларускіх уладаў прызнаць маштабы патэнцыйнага распаўсюду COVID-19 і прыняць адэкватныя меры, - гаворыцца ў звароце. - Сведчанне таму - маштаб самаарганізацыі простых грамадзян, якія высакародна дапамагаюць адзін аднаму і найбольш неабароненым групам насельніцтва, а таксама адвага, выяўленая медыцынскімі работнікамі».

Парламентарыі падкрэслілі, што Еўразвяз салідарны з народам Беларусі «не толькі на словах, але і ў сваіх дзеяннях». Яны нагадалі, што ЕЗ паабяцаў выдзеліць краіне 60 млн еўраў у рамках комплекснага плана Team Europe. Па лініі іншых праграм і інструментаў Беларусі «дапамаглі з пастаўкамі медыцынскага абсталявання і індывідуальнага абсталявання», у тым ліку апаратаў штучнай вентыляцыі лёгкіх, лабараторных набораў, масак, ахоўнай экіпіроўкі і прылад.

«Гэтая пандэмія зробіць свет больш складаным і падзеленым, але неабходнасць бараніць фундаментальныя каштоўнасці і годнасць кожнага чалавека стане яшчэ больш актуальнай. У сувязі з гэтым мы настойліва заклікаем беларускі ўрад забяспечыць свабоднае, справядлівае і бяспечнае правядзенне выбарчай кампаніі, у тым ліку зрабіць так, каб прэтэндэнты маглі сабраць подпісы загадзя і бяспечна, а таксама правесці непасрэдна дзень выбараў у адпаведнасці са стандартамі АБСЕ і рэкамендацыямі экспэртаў у галіне аховы здароўя», - пішуць аўтары звароту.

Яны таксама звярнулі ўвагу на тое, што збудаванне Беларускай АЭС працягваецца, нягледзячы на выбліск COVID-19 на будпляцоўцы. «Беларускія ўлады ўвесь час ігнаруюць асцярогі, выказаныя беларускай грамадзянскай супольнасцю і міжнароднай супольнасцю ў дачыненні да ядзернай бяспекі БелАЭС, і не маюць намеру выконваць рэкамендацыі, выдадзеныя паводле вынікаў стрэс-тэстаў», - адзначылі дэпутаты Еўрапарламента.

Сайт Charter97.org заклікае ўсіх выконваць меры сацыяльнай дыстанцыі.