Süddeutsche Zeitung: Як мінімум кожны 5-ты тэст на каранавірус дае няправільны вынік

Пра даследаванне навукоўцаў з Універсітэта Джонса Хопкінса.

«Паводле аднаго з даследаванняў, вынік папулярных ПЦР-тэстаў часцяком аказваецца адмоўным, хоць людзі заражаныя. Няправільныя вынікі асабліва часта сустракаюцца пры ўзяцці аналізу ў першыя дні пасля заражэння», - паведамляе нямецкае выданне Süddeutsche Zeitung (пераклад - inopressa.ru).

У даследаванні, апублікаваным у навуковым часопісе Annals of Internal Medicine, даследчыкі з Універсітэта Джонса Хопкінса папярэджваюць, што выкарыстанне адных толькі ПЦР-тэстаў для выяўлення каранавіруса не асабліва інфарматыўна. Навукоўцы прааналізавалі сем даследаванняў, якія ўключалі ў сябе вынікі 1,3 тысячы тэстаў.

«Згодна з аналізам, як мінімум 20% тэстаў далі адмоўны вынік, які быў ілжывым. Напраўду пацыенты былі заражаныя, што паказалі далейшыя станоўчыя тэсты. Да таго ж у некаторых людзей, якія нібыта не былі заражаныя, былі выяўлены антыцелы да віруса», - паведамляе выданне.

«Даследнікі таксама паказалі, што вялікую ролю ў дакладнасці тэстаў вызначае час узяцця узораў. У першыя тры дні пасля заражэння было амаль немагчыма выявіць вірусы тыпу Sars-CoV-2. Узятыя так рана аналізы былі практычна бескарыснымі. Мазкі, узятыя на чацвёрты дзень пасля заражэння , у 2/3 выпадкаў таксама давалі ілжывы адмоўны вынік. На пяты дзень - калі звычайна з'яўляюцца першыя сімптомы - 40% вынікаў усё яшчэ былі няправільнымі. Доля памылковых вынікаў падала да 20% на восьмы дзень і затым паступова памяншалася», - гаворыцца ў артыкуле.

«Нягледзячы на тое, што гэтыя працэнтныя звесткі не даюць выразнай карціны, з іх можна зрабіць выснову пра тое, што аналіз варта браць прыкладна на сёмы дзень пасля, гэта значыць прыкладна праз тры днi пасля з'яўлення сімптомаў. Але і тады тэсты часта аказваюцца няўдалымі. Прычына гэтага можа заключацца ў тым, што мазок быў узяў недастаткова старанна. Магчыма таксама, што ў некаторых людзей прысутнічае мала вірусаў у вобласці насаглоткі».

«Аўтары даследавання папярэджваюць, што не варта выключаць інфекцыю толькі на падставе адмоўнага выніку тэсту. Асабліва, калі заражэнне верагоднае ў сувязі з тым, што пацыент кантактаваў з заражаным ці ўжо мае тыповыя сімптомы. (...) Наколькі вялікая доля памылковых дадатных вынікаў, у даследаванні не вывучалася. Па наяўных на сённяшні дзень ацэнак, ілжывая трывога сустракаецца вельмі рэдка», - паведамляе Süddeutsche Zeitung.