Чалец-карэспандэнт Акадэміі навук: У Беларусі развіваецца трэцяя хваля каранавірусу

Каб гэта схаваць, Міністэрства аховы здароўя ідзе на матэматычныя хітрыкі ў стылі Ярмошынай.

Чалец-карэспандэнт Нацыянальнай акадэміі навук Беларусі Павал Грынчук разам з калегам, таксама доктарам фізіка-матэматычных навук Сяргеем Фісенкам «у якасці прыватнай ініцыятывы» прааналізавалі звесткі ў захворванні на каранавірус за перыяд з 6 сакавіка да 19 траўня 2020 года, паведамляе tut.by.

Адна з высноваў экспертаў: у нашай краіне адзначаюцца тры хвалі «кавіду».

– Першая, самая інтэнсіўная хваля развіваецца ў Менску (і, магчыма, у Віцебску), другая ў іншых буйных гарадах, – тлумачыць Грынчук. – Яна пачалася прыкметна пазней за першую. Развіццё сітуацыі апошняга тыдня сведчыць на карысць таго, што з пэўнай верагоднасцю развіваецца яшчэ і трэцяя хваля: у малых гарадах і сельскай мясцовасці.

Сітуацыя з захворваннем застаецца непразрыстай: Міністэрства аховы здароўя не паведамляе звесткі з рэгіёнаў. Таксама складваецца ўражанне, што Міністэрства аховы здароўя імкнецца не дапусціць пераадолення псіхалагічнай планкі «+1000 за дзень» любымі сродкамі. Уключаючы матэматычныя хітрыкі ў стылі Лідзіі Ярмошынай.