Беларуску паклалі ў шпіталь са зламанай нагой, а выпісалі з каранавірусам

Разам з ёй у кватэры пражываюць яшчэ чатыры чалавекі.

У рэдакцыю mogilev.online звярнулася жыхарка Магілёва, маці якой паклалі ў гарадскую лякарню хуткай медыцынскай дапамогі са складаным пераломам нагі. Калі жанчыну шпіталізавалі, яна адчувала сябе добра, у яе не было прыкмет ВРВІ. З медыцынскай установы яе выпісалі з каранавірусам.

Магіляўчанка мяркуе, што яе маці заразілася ў лякарні, бо тэст, як гэта добра відаць на фатаграфіі выпіскі, у жанчыны ўзялі на 15-ы дзень шпіталізацыі, пры тым, што тыповы інкубацыйны перыяд у інфекцыі Covid-19, як вядома, складае два тыдні, а часцяком нават менш - 5-7 дзён. Такім чынам, імавернасць таго, што інфекцыя была падхопленая ў лякарні, сапраўды высокая. Пры гэтым Магілёўская БСМП лічыцца «ўмоўна чыстай» ад каранавіруса.

Нягледзячы на каранавірус, пенсіянерку выпісалі са зламанай нагой. Ёй і ўсёй яе сям'і выдалі прадпісанне аб абавязковай самаізаляцыі. І гэта выклікае асаблівае абурэнне ў магіляўчанкі. Справа ў тым, што хворым на каранавірус, якія праходзяць лячэнне дома, прадпісваецца самаізалявацца таксама ў кватэры, каб не заражаць сваякоў. Аднак у гэтым выпадку гэта ўмова невыканальная. У жанчыны складаны пералом, нага ў гіпсе, і пенсіянерка не зможа абыходзіцца без чужой дапамогі яшчэ доўга. Пры гэтым разам з ёй у кватэры пражываюць яшчэ 4 (!) чалавекі: дачка з мужам і 6-месячным дзіцём і яе муж, у якога дыябет і анкалагічнае захворванне, і ён уваходзіць адразу ў некалькі груп рызыкі што да каранавіруса.

Ва ўмовах немагчымасці для жанчыны самаізаляцыі з пераломам у асобным пакоі, імавернасць таго, што яна заразіць усіх сваякоў, вельмі высокая. І з улікам таго, што мы ўсе ўжо ведаем аб каранавірусе, можна з упэўненасцю казаць: такое становішча спраў стварае небяспеку для яе мужа, таксама пенсіянера, з некалькімі захворваннямі, якія звычайна сур'ёзна абцяжарваюць працяканне каранавіруснай інфекцыі.