Працоўны «Граніту»: У выпадку фальсіфікацыі выбараў рушым на Плошчу

Жыхары беларускіх рэгіёнаў настроены на змену ўлады.

Жыхары Мікашэвічаў распавялі «Медыя-Палессе», чаму яны падпісваюцца за альтэрнатыўных кандыдатаў у прэзідэнты:

Так, Ніна Мікалаеўна Салей, ветэран працы, сказала:

- Калі б не гэтая выбарчая кампанія, я, можа, так і не навучылася б карыстацца інтэрнэтам. Тэлевізар глядзела б. А цяпер беларуская тэлевізія цалкам адвярнулася ад экрана. Настолькі аднабакова ўсё падаецца ў навінах і наогул на карысць існай улады, што глядзець моташна. Я ж на свае вочы бачу, што адбываецца. З кім ні пагавару на тэму выбараў, усе супраць Лукашэнкі, за невялікім выключэннем, а там усе за. У інтэрнэце ж шмат інфармацыі рознабаковай, я хоць валодаю сітуацыяй, што напраўду адбываецца. А адбываецца, як я бачу, тое, што новыя прэтэндэнты робяць усё для таго, каб цывілізавана і вельмі міралюбна ўдзельнічаць у прэзідэнцкай гонцы.

Работнік РУВП «Граніт» прыйшоў на пікеты з дзіцем:

- Лукашэнка саджае людзей ні за што. А людзі просяць дапамогі, каб не захварэць, - сказала дзіця.

Бацька ж заявіў, што яго і многіх, каго ведае, ужо не запалохаць нічым:

- Чаго баяцца, ды і многія мае калегі, сябры, знаёмыя таксама не баяцца. У выпадку фальсіфікацыі выбараў на карысць вядома каго, калі гэта будзе відавочна зразумела, рушым на плошчу. Колькі ж можна цярпець гэта самавольства, хамства, пастаянныя запалохванні! Пара, даўно пара на пенсію.