У Беларусі будуць здымаць біяграфічны фільм пра Мулявіна
6- 18.06.2020, 12:27
- 34,808
Фільм будзе складацца з васьмі серый.
Прыватная студыя «Першая кінавідэакампанія» перамагла ў тэндары на здымкі біяграфічнага фільма пра Уладзіміра Мулявіна – лідара легендарнага ансамбля «Песняры». Інфармацыя пра гэта з'явілася на сайце goszakupki.by, піша tut.by.
Бюджэт праекта складзе 4,9 млн беларускіх рублёў, з іх 2 млн дасць дзяржава. Фільм павінен складацца з 8 серый не менш за 44 хвіліны кожная.
«Першая кінавідэакампанія» з'яўляецца стваральнікам фільмаў «Сляды апосталаў» і «Упыр».
Як паведаміў генпрадзюсар студыі Віктар Лабковіч тэлеграм-каналу «Святы Белавуд», акторскі склад яшчэ не зацверджаны, кастынг яшчэ не праводзілі. Хто выканае ролю Мулявіна, пакуль не ясна.
Мяркуецца, што значная частка здымкаў (80–90%) пройдзе ў Беларусі. Тэрмін вытворчасці – 15 месяцаў. Сюжэт будучай карціны будзе нелінейным і ахопіць дзяцінства, сталасць, першыя крокі ў музыцы і здабыццё папулярнасці музыкам.
Паводле інфармацыі Лабковіча, у набыцці праекта ўжо зацікаўлены «Першы канал», а таксама расейскія онлайн-кінатэатры.