У Кіраўскім раёне Магілёўскай вобласці ўведзены маскавы рэжым

Мясцовым жыхарам таксама рэкамендавана не выязджаць за межы раёна.

Мясцовы райвыканкам выдаў адмысловы загад «у сувязі з эпідэмічнай сітуацыяй і для мінімізацыі рызыкі распаўсюджвання інфекцыі, выкліканай каранавірусам COVID-19, на тэрыторыі раёна», паведамляе «Радыё Свабода».

Мера будзе дзейнай да яе скасавання. Кантроль за яе выкананнем даручаны галоўнаму санітарнаму лекару раёна.

На сайце мясцовага цэнтра гігіены і эпідэміялогіі гаворыцца, што выкарыстанне масак насельніцтвам падчас наведвання грамадскіх месцаў абавязковае.

Жыхарам раёна рэкамендавана «пазбягаць выезду за межы адміністрацыйнай тэрыторыі, за выключэннем крайняй неабходнасці».

Кіраўскі раён быў адным з першых у Магілёўскай вобласці, дзе выявілі каранавірус. 4 красавіка галоўная санітарная лекарка вобласці Святлана Нячай паведаміла, што COVID-19 захварэў «рабочы-мігрант, які вярнуўся з Масквы».

На працягу наступных двух месяцаў не было паведамленняў пра вострую каранавірусную сітуацыю ў гэтым раёне. Пакуль не ўдаецца даведацца, колькі цяпер людзей заразілася COVID-19. На сайце Цэнтра гігіены і эпідэміялогіі такой статыстыкі няма.