29 сакавiка 2024, Пятніца, 12:14
Падтрымайце
сайт
Сім сім,
Хартыя 97!
Рубрыкі

Акупацыйныя ўлады не могуць развязаць пытанне вады для Крыма

23
Акупацыйныя ўлады не могуць развязаць пытанне вады для Крыма

Жыхароў паўвострава плануюць прымусіць да жорсткай эканоміі.

Расейскія ўлады, якія анэксавалі Крым, не здольныя развязаць праблемы з водазабеспячэннем паўвострава, - піша выданне «Проект». Пасля анэксіі рэгіёну Украіна пазбавіла жыхароў доступу да вады з Паўночна-Крымскага канала. На развязанне праблемы расейскі федэральны бюджэт запланаваў выдзеліць дзесяткі мільярдаў рублёў, але запланаваныя вадасховішчы не пабудаваныя, праекты для развязання праблемы мяняюць адзін аднаго, а жыхароў плануюць прымусіць да жорсткай эканоміі, паведамляе «Радыё Свабода».

Да моманту анэксіі Крыма блізу 85 адсоткаў вады паступала ў рэгіён менавіта праз Паўночна-Крымскі канал, - піша «Проект». Цяпер на праграму водазабеспячэння рэгіёну ўлады запланавалі выдаткаваць 87,5 мільярда рублёў. Раней за гэтыя грошы цягам шасці гадоў павінны былі пабудаваць і рэканструяваць 69 аб'ектаў водазабеспячэння і каналізацыі. Большая частка работ не праведзеная, бюджэт на іх павялічаны, а лік запланаваных мерапрыемстваў скараціўся.

Усе шэсць гадоў акупацыі Крыма афіцыйныя асобы кажуць, што рэгіён справіцца і без украінскай вады. Аднак інфраструктура разбураная і на яе рамонт дастаткова грошай не выдзяляецца, а на праектных работах водазабеспячэння выяўляюцца махінацыі. У выніку ўлады прапаноўваюць перавесці частку гарадоў паўвострава на дыферэнцыраваны тарыф. Тыя, хто марнуе мала вады, будуць плаціць менш, чым цяпер. У тых жа, хто марнуе больш за сем кубаметраў на чалавека за месяц, рахункі вырастуць амаль у шэсць разоў: вада для іх стане ў некалькі разоў даражэйшай, чым, напрыклад, у Маскве.

У некаторых частках Крыма ўлады прымушаюць плаціць за ваду нават тых, хто, не дачакаўшыся дапамогі дзяржавы, развязаў праблему сам, - піша «Проект». Ялцінскі пасёлак Краснакаменка жыве без каналізацыі, а водаправод жыхары правялі сабе самі. Але летась ялцінскі водаканал заявіў, што ўсе трубы ў пасёлку належаць яму, а жыхары абавязаныя паставіць лічыльнікі і аплачваць ваду паводле тарыфу. Аналагічная гісторыя адбылася ў пасёлку Тапалёўцы ў Белагорскім раёне Крыма, дзе рахункі атрымліваюць жыхары, якія пабудавалі водаправод за свой кошт.

Сёлета праз гарачае надвор'е паўвостраў можа наогул застацца без вады. У пачатку 90-х у такую ж засуху на Паўднёвым беразе Крыму быў сарваны турыстычны сезон. Жыхарам Алушты тады ваду падвозілі з разліку 20 літраў на чалавека, а Севастопаль атрымліваў ваду па гадзінах. Акрамя таго, ужо летась пляжы Севастопаля закрываліся праз халеру, у гэтым сітуацыя можа пагоршыцца праз знос гарадскіх ачышчальных збудаванняў.

Напісаць каментар 23

Таксама сачыце за акаўнтамі Charter97.org у сацыяльных сетках