Выбары ў ЗША: адставанне Трампа ад Байдэна ўпершыню павялічылася да 10%
3- 3.06.2020, 19:29
- 13,901
Прэзідэнцкія выбары ў ЗША адбудуцца ў лістападзе 2020 года.
Найбольш верагодны кандыдат ад Дэмакратычнай партыі на прэзідэнцкіх выбарах Джо Байдэн павялічыў электаральны адрыў ад прэзідэнта Дональда Трампа, паведамляе «Новое время».
Паводле апытання Reuters/Ipsos адрыў Байдэна ад Трампа сярод зарэгістраваных выбарцаў павялічыўся да 10 працэнтаў.
Апытанне праводзілася сярод 1113 выбарцаў, хібнасць складае да 3 працэнтных пунктаў.
Зыходзячы са статыстыкі апытанняў Reuters/Ipsos, гэта самая вялікая розніца паміж двума магчымымі спаборнікамі на лістападаўскіх выбарах пачынаючы з красавіка.
Таксама дадатковае апытанне паказала, што 64% апытаных падтрымалі масавыя пратэсты праз забойства афраамерыканца Джорджа Флойда, 55% не ўхваляюць рэакцыю Трампа на пратэстныя выступы.
Разрыў паміж Трампам і Байдэнам у 10% паказваў і праведзенае раней апытанне ABC News/Washington Post.
Аднак, згодна з гэтым апытаннем, сярод тых, хто абавязкова прыйдзе на выбары ў лістападзе, пераважаюць прыхільнікі Трампа, сярод прыхільнікаў Байдэна такіх значна менш.
Байдэн з'яўляецца найбольш верагодным кандыдатам ад Дэмакратычнай партыі на прэзідэнцкіх выбарах, якія адбудуцца ў лістападзе 2020 года.
Кандыдатуру Байдэна павінны зацвердзіць на з'ездзе дэмакратычных партый 17 жніўня.