Магілёўцы адклікаюць подпісы за Лукашэнку

Раней іх прымусілі паставіць подпісы за дыктатара.

Магілёўцы пачалі адклікаць свае подпісы за вылучэнне Аляксандра Лукашэнкі на прэзідэнцкія выбары. Адпаведныя заявы яны падаюць у акруговыя выбарчыя камісіі, піша сайт mspring.online.

Журналісты апублікавалі заявы жыхароў аднаго з магілёўскіх інтэрнатаў А.Гарбузавай і Аляксея Нікіценкі. Абодва распавялі, што 26 траўня ў працоўны час да іх прыйшлі работнікі інтэрната і запатрабавалі паставіць подпіс за вылучэнне Лукашэнкі кандыдатам у прэзідэнты.

Гарбузова кажа, што подпісы збіралі вахцёрка і загадчыца інтэрната. Жанчына баялася, што яе з дзецьмі могуць выселіць з інтэрната раней за гэты тэрмін, таму падпісалася.

«Мне давялося падпісацца. Я маці траіх дзяцей, атрымала кватэру, але пакуль пераехаць у яе не магу, бо там вядуцца рамонтныя работы», - тлумачыць Гарбузова.

Нікіценак распавёў, што да яго з аналагічным патрабаваннем прыйшла вахцёрка.

«Я раскайваюся ў сваім учынку і прашу адклікаць свой подпіс за гэтага кандыдата», - напісаў магілёвец у сваёй заяве.

Звесткі пра прымусовы збор подпісаў за дыктатара з'яўляюцца ў СМІ і сацыяльных сетках. Гэтыя звесткі пералічыў у сваёй заяве ў Цэнтрвыбаркам Віктар Бабарыка і прапанаваў не ўлічваць галасы, прымусова аддадзеныя за Лукашэнку.