Расейскі мільярдэр Алег Цінькоў перахварэў на COVID-19
7- 30.06.2020, 16:45
- 16,809
Раней стала вядома, што ён лечыцца ад лейкозу.
Расейскі бізнэсовец і мільярдэр Алег Цінькоў, які лечыцца ад лейкозу, тры месяцы таму перахварэў на каранавірус. Пра гэта ён паведаміў у сваім Інстаграме, піша «Медуза».
Цінькоў распавёў аб ходзе лячэння ад лейкозу, які яму дыягнаставалі ў кастрычніку 2019 года. Бізнэсовец прайшоў тры курсы хіміятэрапіі і выйшаў у рэмісію, але хваробу не ўдалося перамагчы канчаткова, таму на наступным тыдні яму зробяць перасадку касцявога мозгу. Затым яго чакае працяглы перыяд рэабілітацыі.
«Я вядома б не прайшоў усе гэтыя выпрабаванні, калі б не мая сям'я, я ведаў, што я жыву 31 год з найлепшай жанчынай і ў мяне выдатныя 3 дзяцей, але я на 200% пераканаўся ў гэтым апошнія 6 месяцаў ... <...> І вядома, малюся Госпаду, ён мяне выратаваў і захаваў пасля 2-х сэпсісаў і Covid-19. Так, я яшчэ перахварэў на каранавірус 3 месяцы таму», - напісаў Цінькоў (арфаграфія і пунктуацыя захаваныя).
Алег Цінькоў паведаміў, што хворы на лейкоз, на пачатку сакавіка. У красавіку ён сышоў з пасады кіраўніка рады дырэктараў «Тинькофф банка».
Незадоўга да абвяшчэння аб хваробе Цінькова ўлады ЗША абвінавацілі бізнэсоўца ва ўтойванні мільярда даляраў актываў і даходаў, з якіх ён павінен быў заплаціць падатак пры выхадзе з амерыканскага грамадзянства ў 2013 годзе. На момант выстаўлення абвінавачванняў Цінькоў быў у Лондане. Суд па ягонай экстрадыцыі ў ЗША павінен пачацца 27 красавіка, але быў адкладзены да 13 ліпеня.