У замежніцы зніклі больш за $170 тысяч даляраў з ячэйкі ў «Белгазпрамбанку»

Грамадзянка Украіны заяўляе, што яе грошы трапілі ў сюжэт БТ.

Грамадзянка Украіны апынулася сярод пацярпелых кліентаў «Белгазпрамбанка», у якіх пасля ператрусу ў галаўным офісе банка знікла змесціва дэпазітных ячэек. З яе слоў, у яе знаходзілася ў банку больш за 170 тысяч даляраў. Праз знікненне грошай Марына (імя змененае) напісала заяву ў міліцыю. Яна таксама пакінула электронны зварот на сайце Лукашэнкі, у якім папрасіла яго «пасадзейнічаць у вяртанні грашовых сродкаў, канфіскаваных без майго ведама і з незразумелых мне прычын», піша tut.by.

Марына распавядае, што пра знікненне грошай з ячэйкі даведалася 26 чэрвеня, пасля таго, як прыехала ў Беларусь і наведала галаўны офіс «Белгазпрамбанка». Да гэтага яна была ў банку арыентавана ў канцы лютага - пачатку сакавіка. «Пасля гэтага быў карантын, да таго ж патрэбы не было, - удакладняе яна. - А ў мінулую пятніцу разам з жаніхом схадзілі ў галаўны офіс. Скрыня ў дэпазітнай ячэйцы, у якой захоўваліся грошы, была пустой. Адразу ж напісалі заяву на імя Надзеі Ермаковай і выклікалі міліцыю на месца здарэння».

У ГУУС Менгарвыканкама пацвердзілі, што атрымалі заяву.

Са слоў Марыны, у дэпазітнай ячэйцы знаходзілася больш за 170 тысяч даляраў. Яна кажа, што можа пацвердзіць паходжанне грошай, але пра гэта яе ніхто не прасіў перад тым, як забраць іх з ячэйкі.

- Гэта ўсё мае грошы. Гэта не тое, што злачынства, гэта крадзеж на ўзроўні дзяржавы. Мне складана зразумець, як магчыма дзяржаўным структурам зайсці ў памяшканне з ячэйкамі і ўзяць у мяне грошы без маёй прысутнасці ці хаця б папярэдняга паведамлення. Не думала, што такое беззаконне магчымае, - кажа грамадзянка Украіны. - Я ніякім чынам не звязаная ні з выбарамі ў краіне, ні з палітыкай, ні з кіраўніцтвам банка.

Марына распавядае, што разглядала магчымасць адкрыць бізнэс у Беларусі. Магчыма, укласці грошы ў нерухомасць. Але пасля таго, што адбылося, кажа, няма жадання.

8 ліпеня Марыне трэба вярнуцца дадому, яна спадзяецца, што дагэтуль праясніцца сітуацыя з яе зніклымі грашыма. У банку ёй сёння адказалі, што перадалі зварот у Дэпартамент фінансавых расследаванняў Дзяржкантролю, бо «зварот утрымлівае пытанні, развязанне якіх не належыць да кампетэнцыі «Белгазпрамбанка». Марына плануе звяртацца ў іншыя беларускія інстанцыі, у тым ліку пры неабходнасці ў Генпракуратуру, а калі не атрымаецца развязаць пытанне - то і ў міжнародныя арганізацыі.

Марына пакінула электронны зварот на сайце Лукашэнкі, у якім папрасіла яго «пасадзейнічаць у вяртанні грашовых сродкаў, канфіскаваных без майго ведама і на незразумелыя мне прычыны».

Нагадаем, некаторыя кліенты «Белгазпрамбанка» напісалі заявы ў банк праз узлом дэпазітарных ячэек без іх прысутнасці і згубы змесціва. Гэта выявілася, калі яны на мінулым тыдні змаглі праверыць іх змесціва. Да гэтага трапіць у памяшканне з ячэйкамі нельга было праз следчыя дзеянні. Пры гэтым кліенты адзначаюць, што іх не апавяшчалі пра якія-небудзь дзеянні ў дачыненні да іх каштоўнасцяў, а некаторыя з іх, як мяркуецца, патрапілі ў кадр сюжэту дзяржаўнай тэлевізіі, у якім гаварылася пра «справу «Белгазпрамбанка» і паказваліся кадры ператрусу ў банку.

У кадр акрамя грашовых купюр, некаторыя з якіх спакаваныя ў чорныя поліэтыленавыя мяшкі і папяровыя скрынкі, таксама патрапілі памятныя манеты Нацбанку Беларусі (да прыкладу, «Беларускі балет. 2006»), невялікія залатыя зліткі, як мяркуецца, інвестыцыйныя манеты Банка Расеі, тры ўпакоўкі ад леджэраў дзвюх мадэляў - спецыяльных гаманцоў для крыптавалюты (ці былі ў іх самі леджэры - невядома).

Марына таксама кажа, што яе грошы, якія былі моцна закручаныя гумкамі, як мяркуецца, патрапілі ў кадр у сюжэце.