Падчас ператрусу ў Ціханоўскага: «Шукайце забароненыя рэчывы!»

Ператрус на лецішчы Сяргея Ціханоўскі працягваўся ўсю ноч.

Ператрус на лецішчы маці Сяргея Ціханоўскага трывае з 15 гадзін учорашняга дня. Сябар народнага блогера Ігар знаходзіцца там, паведамляе «Радыё Свабода».

«Тры агляды ўжо адбыліся. Тройчы мяняліся сведкі. Прыйшоў начальнік і спытаў: «Вы знайшлі забароненыя рэчывы?» - распавёў Ігар журналістам.

«Усе шукаюць нешта і ніяк не могуць гэта знайсці. Ужо тры пратаколы былі напісаны, увесь дом быў агледжаны тры разы, увесь двор - лазня, адрыны, прыбіральні. Следчыя тэлефануюць уладам, ім кажуць: «Шукайце далей» - і зноў яны нешта шукаюць», - распавёў сябра Ціханоўскіх.

Паводле ягоных слоў, на лецішчы следчыя выявілі мноства дакументаў, якія тычацца дзейнасці Сяргея Ціханоўскага як прадпрымальніка. «Было канфіскавана больш за 200 тэчак з дакументамі, і яны не апісалі, што ў іх, цягнулі ўсё запар. Там паперы з 2003, 2006 гадоў. Я не ведаю, чаму ён іх захаваў. Забралі рацыі - такія амаль дзіцячыя, прымітыўныя, яны выкарыстоўваліся даўным-даўно, калі Сяргей здымаў рэкламныя ролікі», - дадаў Ігар.

Ігар распавёў, што маці Сяргея кепска пачуваецца, у яе хворае сэрца, яна папрасіла следчых ужо паехаць у Гомель - там у яе лекі. «Следчыя заявілі, што маюць права праводзіць свае дзеянні ўночы, калі гэта тэрмінова», - распавёў сябра Ціханоўскага.

Нагадаем, 29 траўня ў Гародні падчас пікету для збору подпісаў затрымалі блогера Сяргея Ціханоўскага і яшчэ дзевяць чалавек. Незалежныя СМІ адзначаюць, што супраць народнага блогера была ўчыненая правакацыя.

Была распачатая крымінальная справа аб «гвалце ў дачыненні да супрацоўнікаў органаў унутраных спраў паводле арт. 364 КК РБ». Усяго паводле крымінальнай справы пра нібыта гвалт у дачыненні да супрацоўнікаў міліцыі, якая была распачатая пасля правакацыі на пікеце ў Гародні, затрыманыя 9 чалавек. Гэта Сяргей Ціханоўскі, Яўген Разнічэнка, Дзмітрый Фурманаў, Уладзімір Навумік, Вяргілій Ушак, Аляксандр Арановіч, Сяргей Калмыкоў, Васіль Баброўскі і Арцём Сакаў.

Траіх затрыманых пасля правакацыі на пікеце для збору подпісаў перавялі ў СІЗА-1 на вуліцы Валадарскага ў Менску. Аб месцазнаходжанні Сяргея Ціханоўскага нічога невядома.

Увечары 8 чэрвеня мінае 10-дзённы тэрмін, калі затрыманым павінны выставіць абвінавачанне альбо вызваліць.

Праваабаронцы прызналі Сяргея Ціханоўскага палітычным зняволеным.