Журналістаў «Белсата» затрымалі пасля жывой трансляцыі з пікетаў у Бабруйску
15- 4.06.2020, 19:14
- 34,898
Іх спыніла машына ДАІ на выездзе з горада.
Як паведаміла журналістка-фрылансерка Алена Дубовік, якая супрацоўнічае з «Белсатам», яе разам з аператарам Аляксандрам Баразенкам затрымалі ў Бабруйску, калі яны вярталіся ў Менск, паведамляе «Белсат».
«Нам сказалі ехаць за машынай ДАІ ў РАУС, бо ў дачыненні да нас вядзецца адміністрацыйная справа. З імі было яшчэ 2 супрацоўнікі АМАП. Яны мяне асобна забралі», - паведаміла Алена.
Што з імі пакуль дакладна невядома: тэлефон Алены выключаны, а Аляксандр Баразенка не бярэ слухаўку.
У аддзяленні міліцыі Першамайскага раёна Бабруйска кажуць, што Алена Дубовік знаходзіцца ва Упраўленні ўнутраных спраў Бабруйскага гарвыканкама. У КУП кажуць, што журналістка ў аддзяленні міліцыі.
Аляксандр Баразенка запусціў жывую трансляцыю ў сваім профілі Facebook. Там відаць, што ён не знаходзіцца ў аддзяленні міліцыі, супрацоўнікі ДАІ правяралі яго дакументы і канфіскоўвалі флэш-картку з камеры.
Ён сказаў, што Алену апытваюць для складання пратаколу.
Сёння яны вялі жывую трансляцыю са збору подпісаў за Святлану Ціханоўскую.