«Саша тры адсоткі», Бабарыка, Ціханоўскі

Што шукаюць беларусы ў інтэрнэце.

Папулярныя запыты ў пошукавых сістэмах – адзін з зрэзаў \ паказнікаў, што хвалюе жыхароў краіны ў пэўны перыяд гісторыі. На просьбу marketing.by сістэма Яндэкс падала рэйтынгі ўсплёскаў цікавасці беларусаў, куды трапляюць запыты, якія за апошні месяц сталі задавацца значна часцей, чым за папярэдні.

Важна адзначыць, што чым большая агульная маса запытаў на тую ці іншую тэму ў параўнанні з узроўнем мінулага месяца, тым вышэйшая магутнасць усплёску. Перавагу атрымліваюць запыты, звязаныя з новымі падзеямі. Таму балы, у якіх вымяраецца магутнасць усплёску, нельга выкарыстоўваць для параўнання цікавасці да падзей, якія адбыліся ў розны час.

Паводле справаздачаў, у красавіку ўвагу беларускіх карыстальнікаў вабіла жыццёва важная статыстыка захворвання на каранавірус і звязаная з ёй праблема дыстанцыйнага навучання дзяцей і аддаленых працоўных зносінаў ва ўмовах самаізаляцыі. Таксама беларусы вылучыліся пошукам пра ключавое хрысціянскае свята – Вялікдзень.

У траўні інтарэсы аўдыторыі пераключыліся. Гэта не значыць, што каранавірус зусім сышоў з парадку дня, але ўспышкі пошукавых запытаў сталі прысвечаны, перш за ўсё, будучым прэзідэнцкім выбарам. Прычым з магутнасці ўсплёску можна зрабіць выснову пра тое, які з кандыдатаў цікавіць карыстальнікаў больш за ўсё. Гэта Віктар Бабарыка.

За суткі з 3 да 4 чэрвеня ў трэнды выбіўся інтэрнэт-мем «Саша 3 адсоткі». Нагадаем, што раней некалькі інтэрнэт-СМІ прапанавалі чытачам паўдзельнічаць у апытанні пра тое, каго б яны выбралі прэзідэнтам Беларусі. У апытанні «Нашай Нівы» Аляксандр Лукашэнка набраў 3%, якія цяпер сталі мемам.