У Малі ліквідаваны верхавод «Аль-Каіды» ў Паўночнай Афрыцы
- 6.06.2020, 13:08
- 10,789
Аперацыю правялі французскія вайскоўцы.
Лідар тэрарыстычнай групоўкі "Аль-Каіда ў ісламскім Магрыбе" (AQMI) Абдэльмалек Друкдаль і "некалькі ягоных найбліжэйшых паплечнікаў" забітыя 3 чэрвеня ў ходзе баявой аперацыі французскіх вайскоўцаў пры падтрымцы іх міжнародных партнёраў на поўначы Малі. Пра гэта ў пятніцу, 5 чэрвеня, паведаміў у Twitter міністр узброеных сілаў Францыі Фларанс Парлі, паведамляе dw.com.
Ce combat essentiel pour la paix et la stabilité dans la région vient de connaître un succès majeur.
— Florence Parly (@florence_parly) June 5, 2020
Аперацыя праходзіла за 80 кіламетраў на ўсход ад населенага пункта Тэсаліт, паблізу мяжы з Алжырам. Яна праводзілася з дапамогай наступальнай групоўкі ў складзе некалькіх шрубалётаў і сухапутных войскаў, падтрыманых авіяцыяй.
Забітыя пяць баевікоў
Як удакладняе французская міжнародная грамадская радыёстанцыя RFI, усяго забітыя пяць тэрарыстаў, уключаючы аднаго з верхаводаў, адказнага за прапагандысцкую працу ў AQMI.
Францыя са жніўня 2014 года праводзіць ваенную аперацыю "Бархан" з мэтай барацьбы з ісламісцкімі групоўкамі ў Малі, Буркіна-Фасо, Маўрытаніі, Нігеры і Чадзе.
