Віктар Бабарыка: Спорт - не справа дзяржавы, гэта справа прыватных клубаў
13- 6.06.2020, 20:56
- 29,649
Мэта дзяржавы - клопат пра здаровую нацыю.
Кандыдат у кандыдаты ў прэзідэнты Беларусі Віктар Бабарыка на сустрэчы са сваёй ініцыятыўнай групай у Берасці адказаў на пытанне пра развіццё спорту.
У Віктара Бабарыкі спыталі пра яго планы ў развіцці спорту ў выпадку абрання. Ён адзначыў, што прафесійны спорт - гэта справа прыватных клубаў, а мэта дзяржавы - здаровая нацыя, паведамляе tut.by.
Групу пратэстуючых «акумулятаршчыкаў» цікавіла меркаванне прэтэндэнта на вышэйшую пасаду з нагоды будаўніцтва пад Берасцем акумулятарнага завода, адным з уласнікаў якога стаў генеральны дырэктар ХК «Дынама-Менск» Дзмітрый Баскаў.
Віктар Бабарыка адзначыў, што ён прынцыпова супраць любых «брудных» вытворчасцяў. На яго думку, для развязання акумулятарнага пытання неабходна ўлічыць меркаванне мясцовых жыхароў.
- У мяне да вас пытанне, - звярнуўся Віктар Бабарыка да аднаго з лідараў «акумулятарнага» пратэсту Дзмітрыя Бекалюка. - У вас жорсткае «не» будаўніцтву або пры пэўных умовах «так»?
- Толькі закрыццё завода. Без варыянтаў, - адказаў Бекалюк.
- Я вас пачуў.
На сустрэчы Бабарыка заявіў, што яго ініцыятыўная група ўжо сабрала 100 000 подпісаў за яго вылучэнне ў кандыдаты ў прэзідэнты (неабходны для рэгістрацыі мінімум). Збор подпісаў працягнецца да 19 чэрвеня.