Бразілія засакрэціла статыстыку аб каранавірусе

Прэзідэнт краіны падтрымаў пастанову ўрада аб абмежаванні доступу да звестак.

Прэзідэнт Бразіліі Жаір Балсанару заявіў у суботу, што падтрымлівае пастанову ўрада часткова засакрэціць звесткі аб колькасці заражэнняў каранавірусам у краіне, паведамляе dw.com.

Раней, вечарам 5 чэрвеня, міністэрства аховы здароўя Бразіліі абмежавала доступ да сайта, які адлюстроўвае хуткасць распаўсюджвання каранавіруснай інфекцыі ў асобных штатах і гарадах краіны. Акрамя таго Міністэрства аховы здароўя перастала паведамляць аб змене агульнай колькасці пацверджаных выпадкаў каранавіруса ў Бразіліі, піша агенцтва Reuters.

Чаму ў Бразіліі часткова закрылі доступ да статыстыкі пра каранавірус

«Зводныя звесткі...не адлюстроўваюць сітуацыю, у якой цяпер знаходзіцца краіна», - напісаў Балсанару на сваёй старонцы ў сацсетцы Twitter. Пры гэтым ён працытаваў абвестку Міністэрства аховы здароўя: «Цяпер распрацоўваюцца іншыя захады для паляпшэння апавяшчэння аб новых выпадках і пацверджанні дыягназаў».

З якой прычыны ўрад наважыў абмежаваць доступ да інфармацыі на сайце са статыстыкай пра каранавірус, паказана не было, падкрэслівае Reuters. Акрамя гэтага, урад наважыў выдаваць у больш позні час штодзённыя паведамленні пра колькасць новых пацыентаў з каранавірусам за дзень, а таксама пра колькасць смерцяў ад COVID-19.

Раней гэтая статыстыка паведамлялася штодня блізу 17:00, але апошнім часам яе сталі апублікаваць блізу 22:00. Балсанару патлумачыў гэты крок імкненнем пазбегнуць «непаўнаты інфармацыі і непаслядоўнасці».

Каранавірус у Бразіліі

Паводле звестак універсітэта Джонса Хопкінса на раніцу нядзелі, 7 чэрвеня, колькасць пацыентаў з каранавірусам у Бразіліі складала 645 771 чалавек. З пачатку пандэміі ад лёгачнай хваробы COVID-19 у гэтай лацінаамерыканскай краіне памерлі 35 026 пацыентаў. У колькасці заражэнняў каранавірусам Бразілія ўжо доўгі час займае другое месца ў свеце пасля ЗША.

Паводле інфармацыі агенцтва Reuters, на тыдні з 1 да 7 чэрвеня колькасць новых заражэнняў SARS-CoV-2 і смерцяў ад COVID-19, пра якія паведамлялі медыцынскія ўлады лацінаамерыканскай краіны, цягам трох дзён запар была самай высокай у свеце.