Расейскі горад пачаў спаўзаць уніз з гары

У Краснаярску пасля залевы з абрыву ўпалі бетонныя блокі і агароджы.

Цяпер мясцовыя жыхары асцерагаюцца, што праз правалы грунту іх 17-павярховы дом таксама пачне спаўзаць у прорву з гары. Пра гэта паведамляе «Лента.ру» са спасылкай на тэлеканал «Енісей».

Расейцы паскардзіліся, што падобнае на Агароднай вуліцы адбываецца рэгулярна. Шматпавярхоўка стаіць на схіле, расколіны на зямлі з'яўляюцца не першым разам. «Усе баяцца, усе палохаюцца. Дома ў нас вельмі шмат маладых сем'яў, студэнты, усё як бы хочуць далей жыць і не баяцца нічога такога», - сказала адна з гараджанак.

На месца аварыі прыехалі прадстаўнікі камунальных і экстранных службаў. Яны ўсталявалі адмысловыя маячкі, мяркуючы па якіх рух грунту працягваецца. Аднак, як заявілі ў дэпартаменце гарадской гаспадаркі, пагрозы абрушэння дома няма, а ў далейшым на праблемным участку правядуць работы па ўмацаванні тэрыторыі.

«Сёння было прынятае рашэнне правесці там контраварыйныя мерапрыемствы, то бок адвесці ваду ад схілу. З рэзервовага фонду горада будуць выдзелены сродкі і ў далейшым праведзены ўсе неабходныя мерапрыемствы для таго, каб прадухіліць далейшае размыццё і разбурэнне адхонаў», - паведаміла прадстаўніца дэпартамента.