NYT: Атрыманыя новыя довады змовы Расеі і талібаў
8- 1.07.2020, 9:12
- 22,065
Гэта пацвярджаецца банкаўскімі пералічэннямі ад узброеных сілаў.
У ЗША ёсць звесткі аб банкаўскіх пералічэннях ад галоўнай управы Генеральнага штаба Расеі (ГРУ) руху Талібан, паведамляе The New York Times са спасылкай на тры крыніцы (пераклад - nv.ua).
Выданне адзначае, што гэтая інфармацыя стала яшчэ адным довадам змовы РФ і талібаў з мэтай забойства амерыканскіх вайскоўцаў у Афганістане.
Паводле інфармацыі NYT, амерыканскія ўлады перахапілі электронныя звесткі аб фінансавых пералічэннях расейскай вайсковай выведкі на рахунак, які звязаны з талібамі.
Перахопленая інфармацыя аб пералічэннях падмацоўвае звесткі, атрыманыя падчас допыту затрыманых у Афганістане баевікоў. Амерыканскія аналітыкі прыйшлі да высновы, што гэтыя пералічэнні праводзіліся ў рамках ўзнагароджання, пра якое тыя казалі.
Спэцслужбы таксама ўстанавілі асобы людзей з групы, звязанай з банкаўскімі пералічэннямі з Расеі, уключаючы мужчыну, які, як мяркуецца, дапамагаў у размеркаванні сродкаў. Мяркуецца, што цяпер ён знаходзіцца ў РФ.
Выданне таксама адзначае, што ў Афганістане былі затрыманыя некалькі бізнэсоўцаў, якія нібыта былі пасярэднікамі паміж ГРУ і Талібанам.
NYT піша, што інфармацыя аб перахопе звестак аб банкаўскіх пералічэннях падрывае сцвярджэнні чыноўнікаў Белага дома, якія заяўлялі, што выведка нібыта не наважылася паведаміць аб змове Расеі з талібамі прэзідэнту ЗША Дональду Трампу.
Раней The New York Times паведаміла, што расейская выведка таемна прапаноўвала баявікам Талібану грошы за забойства амерыканскіх вайскоўцаў у Афганістане.
Са звестак журналістаў, звесткі былі атрыманыя падчас допытаў захопленых баевікоў у Афганістане і перададзеныя прэзідэнту ЗША.