У Маскве прайшла акцыя супраць «абнулення» Пуціна

Актывісты леглі на брук на Краснай плошчы, паказаўшы лічбы «2036».

У Маскве паліцыя затрымала актывістаў, якія зладзілі на Краснай плошчы акцыю «2036», выклаўшы сваімі целамі гэтыя лічбы на бруку. Пра гэта паведамляе тэлеканал «Дождж», піша «Медуза».

У акцыі ўдзельнічалі восем чалавек: муніцыпальныя дэпутаты Басманнага раёна Масквы Люся Штэйн і Віктар Котаў, удзельнікі Pussy Riot Аляксандр Сафееў, Ніка Нікульшына, актывісты Марыя Бязверхая, Гоша Кажэўнікаў, Ліза Самойлава і Марыя Цімафеева.

Затрыманых даставілі ў паліцыю, дзе супраць іх ужылі сілу.

1 ліпеня праходзіць галасаванне ў папраўках да Канстытуцыі РФ, адна з якіх абнуляе прэзідэнцкія тэрміны Уладзіміра Пуціна. У выпадку ўхвалы паправак прэзідэнт зможа пераабрацца на свой пост і застацца ва ўладзе да 2036 года.