Нідэрланды пададуць пазоў супраць Расеі ў ЕСПЧ праз катастрофу MH17

Цяпер справу разглядае Акруговы суд Гаагі.

Улады Нідэрландаў пададуць у Еўрапейскі суд у правах чалавека (ЕСПЧ) пазоў супраць Расеі ў сувязі са знішчэннем у 2014 годзе лайнера, які выконваў рэйс MH17, паведамляе агенцтва Reuters, спасылаючыся на ліст урада краіны ў парламент.

9 сакавіка 2020 года Акруговы суд Гаагі пачаў разглядаць справу аб катастрофе малайзійскага самалёта. Абвінавачаных паводле справы чацвёра: «міністр абароны» групоўкі «ДНР», грамадзянін РФ Ігар Гіркін (Стралкоў), кіраўнік «ГРУ ДНР», грамадзянін РФ Сяргей Дубінскі (Хмуры), яго падначалены, грамадзянін РФ Алег Пулатаў (Гюрза), а таксама грамадзянін Украіны, камандзір выведвальнага батальёна 2-га аддзела «ГРУ ДНР» Леанід Харчанка (Крот). Гіркін, Дубінскі і Харчанка адмовіліся ад удзелу ў працэсе, Пулатаў прадстаўлены групай адвакатаў.

Справу разглядае Акруговы суд Гаагі, бо большасць загінулых былі грамадзянамі Нідэрландаў. Месца правядзення працэсу ў сілу публічнай цікавасці і вялікай колькасці ўдзельнікаў наважылі перанесці з будынка суда ў юрыдычны комплекс горада Бадхуведорпа побач з аэрапортам Схіпхолам.

Адвакат Джэры Скінар ад імя 40 сем'яў сваякоў ахвяраў авіякатастрофы падаў у Еўрапейскі суд правоў чалавека пазоў супраць Расеі і яе прэзідэнта. Пацярпелыя патрабуюць $330 млн кампенсацыі.