Пад Віцебскам за $11 прадаецца старажытная сядзіба 1840-га года

Раней там планавалі зрабіць музей.

За адну базавую адзінку на аўкцыён выстаўленая сядзіба Грабніцкіх у аграгарадку Арэхаўне Ушацкага раёна, раней там планавалі зрабіць музей, піша сайт news.vitebsk.cc.

Сядзібны дом пабудаваны Мікалаем Грабніцкім у 1840 годзе. Старадаўняя пабудова, якая з'яўляецца гісторыка-культурнай каштоўнасцю, была выстаўленая на аўкцыён яшчэ шэсць гадоў таму. Праўда, тады кошт будынка, дзе мясцовыя ўлады хацелі, але не змаглі зрабіць музей традыцыйных промыслаў і гасцінны двор, складала 41 000 еўраў у эквіваленце.

Прадаць сядзібу за такія грошы не атрымалася, і ў 2017 годзе яна была выстаўленая за адну базавую адзінку, што тады складала 23 рублі. Аднак згодна з умовамі таргоў пакупнік павінен быў кампенсаваць мясцовым уладам 634 рублі 25 капеек за падрыхтоўку нерухомасці да продажу.

Тры гады таму пакупнік таксама не знайшоўся, і цяпер гістарычны будынак зноў выстаўляюць са стартавым коштам адна базавая адзінка. Праўда, цяпер гэта ўжо 27 рублёў. Патрабаванне кампенсацыі кошту падрыхтоўкі да продажу таксама засталося.

Дзіўным выглядае тое, што ў апісанні лота паказана, што будынак XIX стагоддзя пабудаваны ў 1920 годзе. Яшчэ больш дзіўнай і жахлівай з'яўляецца фраза ва ўмовах продажу пра тое, што новы ўладальнік павінен ажыццяўляць прадпрымальніцкую дзейнасць з выкарыстаннем набытай нерухомай маёмасці і (або) пабудаванай пасля яе зносу, не менш за адзін год. Няўжо могуць дазволіць знесці помнік архітэктуры? Тым больш, то іншая ўмова патрабуе аформіць ахоўнае абавязацельства матэрыяльнай гісторыка-культурнай каштоўнасці новым уласнікам.

Новы аўкцыён для продажу сядзібы Грабніцкіх у Арэхаўне павінен адбыцца 30 ліпеня.