Барыслаў Бярэза: Пуцін можа развязаць новую вайну, каб атрымаць прэсную ваду для Крыма

Загад аб наборы грамадзян РФ з запасу нясе небяспеку для Украіны.

У 2020 годзе Расея можа пачаць вайсковае ўварванне ва Украіну праз брак вады ў Крыме. Пра гэта гаворыцца ў зводках ГУР, у справаздачы аналітыка амерыканскага цэнтра The Jamestown Foundation Пола Гобла і ў заяве экс-камандзіра сіламі ЗША ў Еўропе Бэна Ходжэса, напісаў у «Фэйсбуку» былы пазафракцыйны народны дэпутат Украіны Барыслаў Бярэза.

Больш за тое, апошняя крыніца папярэджвае пра тое, што ўжо восенню 2020 года расейскі кіраўнік Уладзімір Пуцін можа пачаць новы наступ і правесці ўварванне ва Украіну, каб захапіць дамбу ў Херсоне, якая перакрывае ваду з Дняпра ў Крым. Пры гэтым у Крамлі будуць апраўдвацца за гэта ўзброенае ўварванне гуманітарнай катастрофай, каб пазбегнуць рэзкай крытыкі і жорсткіх наступстваў з боку Захаду. Пагроза больш чым відавочная. Да гэтага трэба дадаць, што рэйтынг Пуціна ў РФ катастрафічна, для кіраўніцтва Расеі, зніжаецца. Рэйтынг даверу да Пуціна апусціўся ўжо да 25%.

Выправіць гэтую сітуацыю можна двума спосабамі. Першы - гэта ўзняцце дабрабыту насельніцтва РФ. Другі - гэта маленькая пераможная вайна, калі на імперскіх амбіцыях і на рыторыцы супрацьпастаўлення РФ да Украіны і Захаду можна аб'яднаць вакол Пуціна большую частку насельніцтва РФ. Першы спосаб патрабуе сур'ёзных эканамічных рэформаў і якасных змен у судова-прававой сістэме РФ, на што Пуцін не наважыцца і не пойдзе. А вось развязаць новую крывавую вайну і забіць некалькі тысяч украінцаў і расейцаў у імя ўзняцця свайго рэйтынгу ён можа. Чужыя жыцці для яго нічога не вартыя. Дзяжурныя прапагандысты Крамля лёгка апраўдаюць Пуціна і якасна прамыюць мазгі і так замбаваным расейцам.

Загад аб наборы грамадзян РФ, якія знаходзяцца ў запасе, - гэта трывожны сігнал для Украіны. Што ён значыць? Што паводле пастановы Пуціна некаторых афіцэраў і салдат запасу, прыпісаных на выпадак вайны ці іншых надзвычайных сітуацый да воінскіх частках і устаноў, часова выклічуць ва ўзброеныя сілы, часткі нацыянальнай гвардыі РФ, органы дзяржаўнай аховы і Федэральнай службы бяспекі. Працягласць іх знаходжання ў вайсковых шэрагах узгоднена з органамі выканаўчай улады суб'ектаў РФ і прапісаная ў адмысловым дакуменце. Пры гэтым пастанова жорстка абмяжоўвае працягласць вайсковых збораў - яны не могуць перавышаць два месяцы - і раней у загадзе заўсёды гэта паказвалі. Зараз гэта ў загадзе Пуціна не прапісана. Ён рыхтуецца да вайсковых дзеянняў.

Таму трэба ўжо сёння падрыхтавацца да абароны. Неабходна не толькі паклапаціцца пра абаронна-загараджальныя дзеянні, але і неадкладна пачаць кансультацыі аб гэтым пытанні з нашымі заходнімі партнёрамі і NATO. Неабходна зрабіць усё магчымае, каб прадухіліць уварванне, не дапусціць новай акупацыі частцы тэрыторыі Украіны і не даць доступ Пуціну да прэснай вады, а таксама ўсебакова падрыхтавацца да абароны Украіны ад крамлёўскага фюрэра.

У 2014 годзе Пуцін скарыстаўся момантам, да якога даўно рыхтаваўся, і адцяпаў Крым, пасля чаго захапіў частку Украіны яшчэ і на Данбасе. Цяпер ён хоча акупаваць яшчэ частку нашай дзяржавы. Прамаруджванне і бяздзейнасць будуць на сумленні Зяленскага. Пуцін ужо вядзе поўнамаштабную тэхнічную, палітычную і вайсковую падрыхтоўку, каб атрымаць ваду. І калі ўсялякі са сцэнарыяў атрымання вады ў Крым будзе Пуціным рэалізаваны, то віна за гэта таксама будзе на Зяленскім. А відэролікам гэтую праблему не развязаць.