Мянчук: Лукашэнка - галоўная перашкода для развіцця краіны
8- 2.07.2020, 11:37
- 28,702
Канстанцін Канапка прапанаваў кіраўніку зняць сваю кандыдатуру.
Мянчук Канстанцін Канапка запісаў відэазварот да Аляксандра Лукашэнкі. У ім ён заклікае "вызваліць кандыдатаў" - за кратамі на сённяшні дзень знаходзіцца Віктар Бабарыка, патэнцыйны кандыдат у прэзідэнты. Наогул у Беларусі ўжо больш за два дзясяткі палітвязняў, паведамляе "Еўрарадыё".
Канапка прапанаваў Лукашэнку зняць сваю кандыдатуру на прэзідэнцкіх выбарах. "Гэта будзе прыгожы крок з вашага боку, які пераканае беларусаў, што вы любіце Беларусь", - заявіў ён.
"За 26 гадоў мы, беларусы, маглі б зрабіць вельмі шмат замест таго, каб падтрымліваць на плаве вашы савецкія фантазіі, - кажа ў відэазвароце Канстанцін Канапка. - Я зараз маю на ўвазе прадпрыемствы-зомбі, якія вы, Аляксандр Рыгоравіч, так любіце. Але якія каштуюць нам велізарных грошай на ўтрыманне, замест таго, каб прыносіць прыбытак".
Аўтар відэазвароту мяркуе, што дзейны кіраўнік дзяржавы - "галоўная перашкода для развіцця краіны", а яго эканамічная палітыка прывяла да таго, што "большасць беларусаў жывуць сціпла, а часта бедныя, не маюць сродкаў да годнага жыцця".