З 1 ліпеня ў Польшчы знізіўся ПДВ на шэраг тавараў

Спажывецкі кошык палякаў стаў таннейшым.

З 1 ліпеня 2020 года ў Польшчы знізіўся ПДВ на шэраг тавараў - гэта гарчыца, апельсіны, ківі, бананы, падгузнікі, лімоны, чабор, сухарыкі, мускатны арэх, тампоны, кунжутныя палачкі, міндаль, крэкеры, карыца, перац, печыва да гарбаты, круасаны, пернікі, чыпсы, выпечка і аўтакрэслы для дзіцяці, паведамляе «Радио Польша».

За гэты набор да 1 ліпеня трэба было б заплаціць 575,35 злотага (130 еўраў), з гэтага часу 507,45 злотага (115 еўраў). Пра гэта паведаміў прэм'ер-міністр Польшчы Матэвуш Маравецкі, дадаўшы: «Мы знізілі ПДВ на многія асноўныя віды тавараў, неабходныя для паўсядзённага жыцця мільёнаў польскіх сем'яў. Мы надалі асаблівую ўвагу дзіцячым таварам, выпечцы, садавіне і сродкам гігіены».

Прэзідэнт Польшчы Анджэй Дуда заявіў, што зніжэнне ПДВ спрашчае падатковую сістэму, ад чаго выйграюць таксама малыя і сярэднія прадпрыемствы: «Прадпрымальнікам будзе прасцей разлічваць ПДВ - ён будзе ўніфікаваны і прасцейшы».