Лукашэнка прызначыў новых кіраўнікоў ва ўправу Нацбанка

Фінансавую сістэму краіны чакае крызіс?

Лукашэнка прызначыў сёння новых кіраўнікоў ва ўправу Нацыянальнага банка, паведамляе БелТА.

Вакансію намесніка старшыні ўправы заняла начальніца галоўнай управы рэгулявання банкаўскіх аперацый, чалец управы Ілона Лядніцкая.

На другі тэрмін паўнамоцтваў чальца ўправы прызначаная начальніца галоўнай управы банкаўскага нагляду Алена Машніна. Чальцамі ўправы Нацыянальнага банка таксама сталі начальнік галоўнай управы аперацый на фінансавых рынках Дзяніс Гарагляд і начальнік галоўнай управы манетарнай палітыкі і эканамічнага аналізу Дзмітрый Мурын.

«Я мяркую, што кандыдатуры чальцоў управы Нацыянальнага банка прапрацаваныя?» - спытаў Аляксандр Лукашэнка. Ён адзначыў, што сённяшнія прызначэнні сталі нагодай для кароткага і, як ён разлічвае, змястоўнай размовы з кіраўніцтвам Нацыянальнага банка аб сітуацыі ў банкаўскай сферы і ў эканоміцы.

Старшыня ўправы Павел Калавур прадставіў кандыдатаў і коратка распавёў аб іх кар'ерным шляху, ахарактарызаваўшы як граматных і ініцыятыўных спецыялістаў.

Эканамісты адзначаюць, што Нацбанк усё больш страчвае сваю незалежнасць ад дзяржавы, што можа прывесці да сур'ёзных наступстваў для фінансавай сістэмы нашай краіны.