Беларусы забіраюць грошы з банкаў

У чэрвені знізіліся як рублёвыя, так і валютныя дэпазіты.

Паводле звестак Нацбанка пра шырокую грашовую масу на 1 ліпеня, аб'ём рублёвых дэпазітаў беларусаў зноў знізіўся пасля малаважнага прыросту ў папярэднім месяцы. Прадаўжаюць зніжацца і валютныя дэпазіты: у параўнанні з пачаткам года іх аб'ём скараціўся больш чым на паўмільярда даляраў, піша tut.by.

На пачатак гэтага месяца агульны аб'ём рублёвых дэпазітаў фізічных асобаў у беларускіх банках склаў 5 мільярдаў 32,2 мільёна рублёў. У параўнанні з папярэднім месяцам рублёвыя дэпазіты зменшыліся на 5,7 мільёна рублёў, з пачаткам года – на 99,2 мільёна. Да сакавіка рублёвыя дэпазіты фізічных асобаў раслі цягам 17 месяцаў запар, у сакавіку яны знізіліся на 191,7 мільёна, у красавіку – на 79,4 мільёна, а ў траўні зноў прыраслі на 13,4 мільёна рублёў.

Валютныя дэпазіты фізічных асобаў на 1 ліпеня склалі 5 мільярдаў 635,6 мільёна даляраў. У параўнанні з папярэднім месяцам яны знізіліся на 132,2 мільёна даляраў, з пачаткам года – на 580,7 мільёна даляраў. Валютныя дэпазіты зніжаюцца кожны месяц з пачатку года. За травень яны зменшыліся на 70,8 мільёна даляраў, красавік – на 193,5 мільёна даляраў, за сакавік – на 140,3 мільёна даляраў, за люты – на 26,1 мільёна, за студзень – на 17,5 мільёна.

На думку Нацбанка, адток рублёвых дэпазітаў, а таксама высокі попыт на крэдытныя рэсурсы ў першым квартале года выступілі чыннікамі падтрымання спажывання, а таксама ціску на валютным рынку.