СМІ раскрылі асобу луцкага тэрарыста
- 21.07.2020, 14:06
- 21,990
Мужчына назваўся ўкраінскай паліцыі як Максім Плахой.
Сапраўднае імя мужчыны, які захапіў блізу 20 закладнікаў ва ўкраінскім Луцку, – Крываш Максім Сцяпанавіч, паведамляе сайт «Новы час» са спасылкай на рэгіянальныя выданні.
Паводле звестак выдання, мужчына, які назваўся паліцыі як Максім Плахой, мае судзімасць і прымусова лячыўся ў псіхіятрычным шпіталі.
Максім Крываш прапісаны афіцыйна ў Дубне Ровенскай вобласці. У месцах пазбаўлення волі адседзеў некалькі тэрмінаў, тады ж ён і напісаў сваю кнігу “Філасофія злачынцы”.
Агенцтва піша, што пасля выхаду з турмы знаходзіўся ў поле зроку паліцыі. Паводле словаў людзей, якія яго апазналі, мужчына рабіў уражанне «дзіўнага чалавека».
Нагадаем, 21 ліпеня ў Луцку на Тэатральнай плошчы мужчына захапіў пасажырскі аўтобус і забарыкадаваўся ў ім. На месцы здарэння былі чуваць стрэлы, а на вокнах аўтобуса засталіся сляды ад куль.
Паводле звестак паліцыі, у захопленым аўтобусе знаходзяцца 20 закладнікаў. У злачынцы пры сабе ёсць выбухоўка і зброя.
У МУС паведамілі, што мужчына сам патэлефанаваў у паліцыю і назваўся як «Максім Плахой».
Выразных патрабаванняў у нападніка няма. У вобласці ўведзеныя аператыўныя планы Закладнік і Бумеранг.